Sociologu, Jeton Brajshori, duke folur për vrasjen e 21-vjeçares që u privua nga jeta nga ish-bashkëshorti dje në Ferizaj, e që dyshohet se i njëjti është recidivistë i veprave penale thotë se në Kosovë persona të tillë enden të lirë rreth 850.
Brajshori tha se derisa ekziston një numër kaq i madh i recidivistëve, dhuna në Kosovë ka filluar që “fatkeqësisht të bëhet normalitet”.
“Ka shumë recidivistë në Kosovë, me sa e di unë janë diku rreth 850, të cilët enden të lirë dhe normalisht me një numër kaq të madh atëherë ne do të presim që vazhdimisht të ketë dhunë, fatkeqësisht dhuna te ne ka filluar të bëhet normalitet dhe kjo është ajo çfarë ne si shoqëri duhet të kemi parasysh dhe të ruhemi për të ardhmen tonë”, tha ai në emisionin “Info Nata” në Tëvë1.
Ndërkohë, lidhur me recidivistët në Kosovës, ka reaguar edhe Adelina Berisha nga Rrjeti i Grave të Kosovës, e cila tha se derisa ata janë dënuar me gjoba dhe dënime të ulëta ka qenë si mesazh që të vazhdojnë me katrahurën e tyre.
“Janë mbi 850 recidivistë, të cilët sillen sot të lirë ata janë anëtarë të familjeve ata janë fqinj, ata janë pjesë e komunitetit, në qoftë se nuk është punuar me ta me ndonjë program specifik që do të kontribuonte sado pak që ata të kthehen në shoqëri si persona që kanë reflektuar dhe janë përmirësuar dhe nuk duan më t’i përsërisin sjelljet e tyre. Fatkeqësisht, ne do t’i kemi prapë të gjitha mundësitë që ata t’i përsërisin veprat e tyre, ku veprat e tyre të shkojnë dhe të bëhen më të rënda, sepse shpesh me këto dënimet me gjobë, me këto dënimet e ulëta ndoshta edhe vetë i kemi jap mesazhin institucioni iu ka jap mesazhin që vazhdoni me këtë qasjen e juaj që e keni e me mënyrën se si silleni, sepse ndaj jush nuk do të ketë kurrfarë ndëshkueshmërie”, deklaroi Berisha.
Pasditen e së premtes, 21-vjeçarja është vrarë brenda Qendrës për Punë Sociale në Komunën e Ferizajt nga ish-bashkëshorti i saj 36-vjeçar. I dyshuari la të plagosur edhe 15-vjeçarin, vëllaun e viktimës. Autori i krimit u arrestua nga Policia e Kosovës, edhe pse i njëjti provoi të arratiset./teve1.info/
