Është njëri nga të mbijetuarit e Masakrës së Poklekut.
E momentet e rënda që i përjetoi e ka të vështirë t’i tregojë.
Kjo pasi 83-vjeçari, Hysen Kluna pa me sytë e tij tmerret që kryen forcat serbe 26 vite më parë në këtë fshat.
“Masakër më e vështirë se kjo nuk ka pas, këtu as në mal e as në livadh, por jemi vrarë drejt e në sallon. Fëmija prej shtatë muajsh është vra e është kallë, kur jemi dal të gjallët na. Në jemi hi në ahër, kur e kemi pa që i ka dal flaka, aty tani hupi krejt ymydi që aty s’ka kurgjo”, tregoi 83-vjeçari.
E i plagosur në këtë masakër mbeti edhe vetë Kluna.
“Ne jemi afruar te dera veç krisi automati, e si krisi autoami ne e ditëm që u vranë ata. Po thoshim më ishalla s’po bahet. U kthye polici ka thanë mbylle derën, Ramadani e ka mbyll derën atij 7 anëtarë i kanë mbetur aty. Ka gjuajtur bombë në mes tani është hy brenda, automat, tani jam plagosur unë. Kur ka gjuajtur me automat jam plagosë në dorë të majtë, por më është mpirë trupi”, thotë ai.
Edhe pas 26 vitesh, ai thotë se nuk ka shpresë që kryesit e veprës do të dalin para drejtësisë.
“Shpirti është i ëmbël, por më mirë ish kanë me pas kanë i vrarë në atë tabelë ku janë shkruar ata se që jam sot këtu. Unë nuk ka ditë që nuk jam me ta. Nuk është kollaj. Kurrë as nuk ka drejtësi, këtë mbaj mend”, tregon Kluna.
Shtëpia Muze e familjes Muqolli, brenda së cilës ruhen kujtimet për të vrarët në masakrën makabre, u vizitua këtë të enjte nga qytetarë të shumtë.
Në mesin e 54 të vrarëve në Poklek, 24 ishin fëmijë nga mosha gjashtë muajsh deri në 17 vjeç.
