Autori: Jona Kelmendi
Mbetet një nga figurat më të dashura dhe më të respektuara të Kosovës.
Ibrahim Rugova ka lënë gjurmë të thella në historinë e vendit dhe ndikimi i tij ndjehet edhe jashtë kufijve të Kosovës.
Ish presidenti i parë i Kosovës, konsiderohet si arkitekt i shtetit më të ri në Evropë.
Ai ishte një politikan, studiues dhe shkrimtar shqiptar.
Virtytet e tij të larta prej një burrështetasi që punoi për paqe, liri dhe demokraci u kujtuan edhe në 81 vjetorin e lindjes së tij.
Për rolin dhe figurën e tij, kanë folur edhe bashkëpunëtorët e afërt të Rugovës.
Njëri prej tyre është Muhamet Hamiti, anëtar i Lidhjes Demokratike të Kosovës, i cili e vlerësoi lartë figurën e Rugovës.
“Ka qenë njeri i dijshëm, vizionar tolerant ka bashkëpunuar me të gjithë, ai ka qenë figura më e madhe politike e Kosovës e këtij shekulli, shtetasi i parë i Kosovës e ka punuar me të tjerët dhe ka ditë të punojë edhe me ata që s’pajtohen me të e sot kjo kulturë mungon. Rugova duhet të vlerësohet e të çmohet prej njerëzve që e njohin këtë histori, shohin përparimet që ka bërë Kosova, miqtë që ka krijuar në botë e sot jemi shtet i pavarur dhe sovran dhe kudo në botë edhe sot Rugova edhe Kosova e pavarur janë një binom i pandashëm”, ka thënë Hamiti.
Hamiti shtoi se trashëgimia e Rugovës është në themelet e shtetit të Kosovës.
“Trashëgimia e tij është ne themelet e shtetit të Kosovës, Ibrahim Rugova është njeriu që i ka pri Lëvizjes për liri e pavarësi e demokraci të Kosovës, lëvizje e viteve të 90-ta e cila qoj në çlirimin e Kosovës natyrisht pas një lufte me mjete politike edhe ushtarake të shqiptarëve. Trashëgimia e tij është në themele dhe duhet të jetë në themele të këtij shteti sepse me Rugovën ne e kemi bërë shtetin”, është shprehur tutje Hamiti.
Rugova sot është kujtuar edhe nga udhëheqësit e institucioneve të vendit.
Presidentja Vjosa Osmani ka nderuar figurën e tij, duke e cilësuar si një simbol të paqes dhe të frymës institucionale.
E gjithashtu edhe kryetari i AAK-së, Ramush Haradinaj, ka përkujtuar kontributin e Rugovës, duke theksuar rolin e tij në shtetformimin e Kosovës.
Rugova u zgjodh, më 23 dhjetor 1989, nga themelimi kryetar i Lidhjes Demokratike të Kosovës, partisë së parë politike në Kosovë që sfidoi drejtpërdrejt regjimin komunist në fuqi.
Ai ishte në krye të kësaj partie deri më 21 janar 2006 kur edhe ndërroi jetë në moshën 61 vjeçare
Ibrahim Rugova u zgjodh President i Kosovës në mars të vitit 2002 dhe u rizgjodh edhe më 2004.
Rugova vdiq më 21 janar 2006 në Prishtinë dhe u varros në Bregun e Diellit me nderimet më të mëdha të popullit të Kosovës.
Në përvjetorin e vdekjes së Ibrahim Rugovës, më 21 janar 2007, Presidenti i Kosovës, Fatmir Sejdiu, dekoroi Presidentin historik të Kosovës me Urdhrin “Hero i Kosovës”, titulli më i lartë në vend që u jepet figurave historike shqiptare dhe të Kosovës që kanë bërë “vepra trimërie për lirinë dhe pavarësinë e Kosovës”.
