Gjithçka nisi në natën e 12 qershorit kur paramilitarët serbë, hynë në shtëpinë e Isa Balajt në Pejë.
E dy prej tyre, u ngjitën në katin e dytë.
Në dhomën e pritjes të kësaj shtëpie, po qëndronin 12 anëtarët e familjes Balaj, ku 7 prej tyre ishin fëmijë.
Pasi i nxorën më dhunë dy kryefamiljarët, gratë dhe fëmijët i ulën në këtë formë.
E pas disa minutave drejt tyre pa mëshirë, filluan t’i zbrazin karikatorët.
“Fëmijët i vranë, edhe unë vet i mora 9 plumba. Kunatin e kanë marrë e kanë masakruar. Burri e ka gjetë të varret e Katariqit. Unë me Nitën kemi qenë të plagosura deri në mëngjes, kemi nejt të plagosura”, rrëfen e mbijetuara, Halise Balaj.
Shenjat e plumbave në trup kur u mundua t’i shpëtoi fëmijët i ka ende Halise Balaj.
Por, nga 4 fëmijët, arriti ta shpëtonte vetëm Vetonin.
“Unë qysh kesh ulur këtu, nënën e kam pasur këtu, jam fsheh pas nënës. Prej aty ku jeni ju (dera e sallonit) kanë gjuajtur sa kanë mundur me kallasha. Kur filluan t’i ndërrojnë karikatorët, unë kam shkuar zvarrë dhe dola në ballkon dhe kam kërcyer poshtë”, tregon i mbijetuari, Veton Balaj.
Veton Balaj, atë kohë vetëm 8 vjeçar nuk pranoi të binte përsëri në duart e paramilitarëve serb.
“Kur kam dal në ballkon, i kam parë edhe dy policë serb tek dera poshtë. Kam ardhur këtu ngadalë, kamë kërcyer poshtë dhe kam shkuar të Riza dhe Servete Lozi, kam shkuar pas shtëpisë së tyre”, shtoi ai.
Të dy, nënë e bir, që i shpëtuan kësaj masakre, as pas 24 vjetëve nuk po i shpëtojnë ankthit të saj.
Në mesin e fëmijëve që shpëtuan, ishte edhe Roni 4 vjecar.
Pavarësisht që dihen emrat e paramilitarëve serbë që morën pjesë në këtë krim, asnjë prej tyre deri me tani nuk është përballur me drejtësinë.
Ndërsa familja Balaj në Pejë, edhe pas 24 vjetëve jeton çdo ditë me shenjat se këtu, 8 paramilitarë serbë shtien pa mëshirë në më të dashurit e tyre.
Kronika e realizuar nga gazetari Fidan Zejnullahu
