Kryetari i Kuvendit të Kosovës, Glauk Konjufca, në Ditën Ndërkombëtare të Gruas, ka thënë se kjo datë vijon ta zgjojë ndërgjegjen e secilit për të ecur në rrugën drejt barazisë.
Përmes një postimi në Facebook, Konjufca ka shkruar se gruas i duhet sfera publike, por sferës publike i duhet gruaja edhe më shumë.
Po ashtu, kryekuvendari ka shkruar se Qeveria është vazhdimisht e angazhuar për të marrë masa në drejtim të luftimit të pabarazisë gjinore.
“Dita e Gruas, e shënuar më 8 Mars vijon ta zgjojë ndërgjegjen e gjithsecilit për të ecur në rrugën drejt barazisë. Vazhdimisht jemi angazhuar për të marrë masa në drejtim të luftimit të pabarazisë gjinore. Arritjet janë të numërueshme, siç është tepër evidente se edhe më shumë mbetet për t’u bërë. Më shqetësuesja nga të gjitha ngelet dhuna në familje që, pavarësisht masave ligjore dhe institucionale, vazhdon të jetë e lartë. Gruas i duhet sfera publike, por sferës publike i duhet gruaja edhe më shumë, sepse pa gruan ajo nuk mund të jetë e mirëfilltë. E në anën tjetër, domeni socio-ekonomik pa gruan e integruar plotësisht, ngelet vetëm një rend ku menaxhohet dhuna apo shtypja, e përmasave dhe natyrave të ndryshme, herë duke bërë bujë e më shpesh në heshtje”, thuhet në postimin e Konjufcës.
Më tej, Konjufca ka shkruar se duhet të përfitojmë nga rasti që ofron 8 Marsi, për të dëgjuar si thirrje për reflektim dhe angazhim të pandërprerë.
“Në shoqërinë tonë ne kemi edhe figurën e gruas luftëtare, figurë e tejkalimit të paracaktimit, që angazhon aftësitë në shërbim të lirisë së përbashkët. Kjo na nderon, por dhe na shërben si shembull që duhet përthyer bashkërisht në figurën e gruas përballë sfidave të paqes. Të përfitojmë nga rasti që na ofron 8 Marsi, duke e dëgjuar atë si thirrje për reflektim dhe angazhim të pandërprerë, deri në emancipim të plotë, i cili na përmbush të gjithëve”, thuhet tutje në postimin e tij.
Ndër të tjerash, ai ka thënë se ngritja e pozitës së gruas është diçka prej të cilës fitojnë të gjithë, ndërsa pabarazia është kundërshoqërore, kundërpolitike dhe kundërekonomike.
“Ta ruajmë në vëmendje se kur themi grua, aty për aty kemi prekur gjysmën e popullsisë së një vendi, por edhe të gjithë botës. Në këtë kuptim, përveç se e drejtë, ngritja e pozitës së gruas është diçka prej të cilës fitojnë të gjithë, sepse angazhimi i plotë i shoqërisë përbën një rendiment maksimal të gjithanshëm. Ndërsa pabarazia, si padrejtësi, është edhe kundërshoqërore, kundërpolitike dhe kundërekonomike”, ka shkruar Konjufca./teve1.info/.
