Pikërisht mungesa e infrastrukturës së duhur u bë arsye që Astrit Hasani ti drejtohet Gjykatës Themelore në Mitrovicë më një kërkesë në vitin 2018.
Ai ka paditur Qendrën për Punë Sociale për shkak të kufizimit të lëvizjes në objekt për personat me nevoja të veçanta në Mitrovicë.
Hasani tregon angazhimin shtatë vjeçar për fitimin e këtij rasti.
“E kam padite qendrën për punë sociale për shkak që s’ka pas qasje për me be një nënshkrim që duhet të bëhej çdo 6 muaj mu duhej në 2018 ka ndodhur rasti. 7 vite kam lobuar rreth këtij rasti me shoqëri me Hendikos”, ka thënë qytetari Astrit Hasani.
37 vjeçari, thotë se këtë hap e ka ndërmarrë për personat me nevoja të veçanta në këtë komunë.
“Te paktën jo për mu më shumë po për tjerët persona që janë me karrocë me bë me u ndje mirë se më bënë me e ngrit zërin për të tjerët por normal edhe për vete. Shumë mirë më ka bë me u ndje. 7 vite shumë gjatë bilës dy vitet e fundit i hupa shpresat, thash ka me hupë rastin po më në fund e arrita qëllimin e fitova”, thotë ai.
Hasani tregon për vështirësinë e tij, mirëpo thotë që asnjëherë nuk do ndalojë së kërkuari të drejtat e tij.
“Mos me pas dikë me më ndihmuar nganjëherë unë maroj. Ka vështirësi se unë më shumë udhëtoj me taxi edhe ata e kanë problem me e bartë karrocën bile më thonë shpesh herë me pas këmbë si ti unë nuk isha ulë këtu, por prapë nuk ndalem dua me luftuar për të drejtën time. Planet e mija janë që për të drejtat e mija s’ka me u ndalë kurrë qysh nuk jam ndalë. Mesazhi im është që si i ri si i vjetër si të ka fal Zoti, lufto për të drejtën tënde”, ka thënë Hasani.
I njëjti me përkushtimin që ka është edhe duke punuar.
“Kemi aktivitete i thirri në telefon të rinjtë unë, që me u mbledh e me bë aktivitete e me luajtur. Nuk kam shumë punë të rëndë se më kuptojnë këta si jam unë, por pak apo shumë me u merr me diçka, bile e di që për diçka që po vijë”, tregon ai.
Sipas vendimit të gjykatës Themelorë në Mitrovicë, Ministria e Financave, Punës dhe Transfereve/ Departamenti për Pensione Prishtinë/ Zyra në Mitrovicë, duhet të kompensoj Astritin për diskriminim që i është bërë.
