Seanca u planifikua të niste në ora 10:00.
Por, të zgjedhurit e popullit, edhe një herë nuk arritën me kohë.
Kështu si gjashtë seancat e kaluara, edhe ajo e së dielës filloi me vonesë.
Por, jo çdo deputet u vonua.
Edhe një herë me kohë, arriti ish-gjenerali, Fadil Hadergjonaj.
Deputeti nga LDK duket se disiplinën ushtarake nuk e ka harruar.
E pas afër gjysmë orë, filloi edhe seanca konstituive e Kuvendit të Kosovës.
Kryesuesi i seancës, për partinë fituese pati kërkesën e njëjtë.
“Ftoj partinë fituese ta propozoj emrin për kryetar të Kuvendit”.
E para deputetëve përsëri doli përfaqësuesi i VV-së, Glauk Konjufca.
Propozimi nuk kishte ndryshuar.
“E propozojmë sërish deputeten Albulena Haxhiu për kryetare të Kuvendit, iu ftoj ta mbështesni”.
Në këtë formë, emri i Albulena Haxhiut u hodh për herë të pestë në votim.
Përfundimi ishte i njëjtë.
“57 vota për, seanca ndërpritet, vazhdojmë të martën”, tregoi Dehari.
Dështimi i së dielës, solli edhe të qeshura në sallë.
Deputetët e Kuvendit të Kosovës të martën do të mblidhen për herë të tetë për seancën konstituive.
