Kërkesa të cilën në Gjykatën Kushtetuese e deponoi Aleanca për Ardhmërinë e Kosovës, mund të mos trajtohet fare nga institucionet.
Gzim Shala nga Instituti i Kosovës për Drejtësi, tregon se bazuar në praktikat e deritanishme të Kushtetueses, ajo nuk trajton akte të cilat nuk janë miratuar.
Këtë status, sipas Shalës e ka edhe çështja e votimit të fshehtë për zgjedhjen e kryetarit të Kuvendit, pasi deri më tani nuk ka kaluar në Kuvend.
“Bazuar në Kushtetutën e Republikës së Kosovës, ligjin për Gjykatën Kushtetuese dhe standarde e deri tanishme kjo kërkesë nuk mund të quhet e pranueshme nëse Gjykata nuk e ndërron praktikën e saj. Kështu për rastin konkret nuk kemi të bëjmë me një akt të miratuar i cili kontestohet për shkak se kemi të bëjmë më një akt i cili nuk është miratuar dhe për këtë arsye vlerësohet si një kërkesë tillë duhet të shpallet e papranueshme për tu shqyrtuar nga ana e Kushtetueses”, ka thënë Shala.
Kërkesa, sipas Shalës mund të trajtohet vetëm nëse Gjykata ndryshon standardet e veta.
“Rastet nga e kaluar kanë treguar se Gjykata Kushtetuese edhe ka ndërruar standardet e veta në lidhje me pranushmërine e rasteve do të thotë sic ishte rasti i Kryeprokurorit të shtetit. Përkundër faktit që një herë ishte trajtuar rasti edhe pa u shtjerrru mjetet juridike më vonë Gjykata e ndërroi këtë standard dhe detyroi palët që të shtjerrin mjetet juridike për ta vlerësuar në merita kërkesën përkitazi me procesin për kryeprokuror”, ka përfunduar Shala.
E Kushtetuesja, sipas profesorit Mazllum Baraliu, duhet t’i kthej shpejtë përgjigje Aleancës për Ardhmërinë e Kosovës.
“Kjo është çështje shumë e lehtë teknike me tepër se e ndërlikuar juridike dhe politike dhe do të duhej të veproni shpejtë brenda 60 ditëve por unë mendoj që edhe brenda disa ditëve do të duhej nëse e pranojnë, pra nëse ka pranueshmëri të kërkesës”,ka thënë profesori Baraliu.
Megjithatë, Baraliu është optimist se partitë politike do të dalin nga ngërçi politik.
“Nuk ka nevojë as të pritet përgjigja nga Gjykata Kushtetuese meqenëse Presidentja e vendit të enjten do të kontaktojnë partitë politike do të duhej të kishte një marrëveshje politike. Kjo është një ngecje politike për shkak të pamundësive apo paaftësive të dy taborëve të krijojnë institucione”, përfundoj Baraliu.
Të enjten do të jetë tentativa e 16-të për konstituimin e Kuvendit të Kosovës.
