Janë pamje të ushtarëve serbë të zënë rob nga Ushtria Çlirimtare e Kosovës.
Ata u kapën nga ushtarët e Brigadës 141 “Mehë Uka” në zonën e Shalës, më 6 janar të vitit 1999.
Asokohe, komandant i batalionit të parë, ishte Hajzer Istrefi.
27 vjet pas, Istrefi kujton momentin kur ushtarët serbë u futën në këtë fabrikë në Bare të Mitrovicës.
“Ajo ka qenë një kërkesë e ushtarëve se duhet t’i pushkatojmë menjëherë, unë kam ndërhyrë dhe i kam thënë, unë marr përgjegjësinë për ta, ju nuk duheni të merreni me këtë çështje dhe duhet të përgatitemi se ndoshta pas këtyre fillojnë me ardhë edhe forca tjera ushtarake me ditë se çfarë ndodhë me këta dhe të gjithë ushtarët që kanë qenë këtu duke pushuar prej ndërrimeve që kanë qenë me i qitë në vijë të frontit me bë përforëcimin e vijës së frontit dhe me pasë nën kontroll krejt këtë gjendje dhe këtë pjesë”, tregon Istrefi.
Nga këtu, duarlidhur e symbyllur, të tetë ushtarët serbë u sollën në këtë shtëpi.
Istrefi rrëfen se robët u trajtuan në bazë të rregullave të luftës.
“Më kujtohet një prej tyre një më i riu i cili m’u drejtua duke thënë se kam një kërkesë, dhe i kam thënë fol, tha unë po e di që ju po na çoni me na pushkatue tha po kërkesa ime e fundit kish me qenë se unë i kam këtu dokumentacionet në xhep me ma informu familjen se ku po mbetem unë dhe kishte një frikë të madhe dhe iu kam drejtuar se neve edhe pse jemi një ushtri vullnetare, jemi ushtri që zbatojmë ligje, kemi rregulla dhe absolutisht neve nuk do t’iu pushkatojmë”, shprehet ish-komandanti i Bataljonit të parë.
Tetë serbët, ish-komandanti Istrefi tregon se vendosën t’i shkëmbenin nëntë ish-bashkëluftëtarë që gjendeshin në Nish.
“Edhe ky ka qenë rasti më i mirë për me pasë një lloj barazimi që ata edhe na me i liru por edhe me i nxjerrë shokët tonë prej atij burgu dhe me i liru knej vazhdimisht para se me i liru kemi qenë nën presion prej të gjithë faktorëve veç me i liru pa e marrë në konsideratë me i liru ata ushtarët tanë”, tregon Istrefi.
Ai kujton edhe një kërkesë që e kishte komandanti i Zonës për ta.
“Ju vetëm e folni të vërtetën, kurrgjë më shumë dhe ata kanë thënë aty se ne do ta flasim gjithmonë të vërtetën se çfarë ka ndodhë prej që janë zënë rob dhe vërtetë prej gjithë intervistave që kemi pasë mundësi me i dëgju, ata e kanë thënë të vërtetën gjithmonë” , thotë ai.
Ushtarët shqiptarë ishin kapur në kufirin me Shqipërinë, në pritën ku mbetën të vrarë Mujë Krasniqi dhe 41 bashkëluftëtarët e tij.
