Peja dhe Golden Eagle Ylli do të luajnë në finale të Ligës Unike.
Finalen, skuadrat e elitës së basketbollit kosovar, e siguruan të mërkurën pas fitoreve në ndeshjet gjysmëfinale.
Në terminin më herët të mërkurën, Peja fitoi bindshëm ndaj Vëllaznimit të Gjakovës, 82:67.
Statistikat më të mira te Peja i pati Logan Routt me 10 pikë, shtatë kërcime e një asistim, kurse te Vëllaznimi me lojë të mirë u dallua Ziggy Ried, që e përfundoi takimin me 17 pikë, shtatë kërcime e dy asistime.
Në ndeshjen tjetër, Golden Eagle Ylli e mposhti Besëlidhjen e elitës së basketbollit të Shqipërisë.
Ndeshja u mbyll 76:63 në të mirë të suharekasve.
Scott Bamforth i shënoi 30 pikë në fitore, ndërsa kontribuoi edhe me pesë kërcime e tri asistime.
Trey Edmonds ishte më i miri te Besëlidhja me dyshifror të dyfishtë prej 23 pikëve e 11 kërcimeve, por të pamjaftueshme për ta shmangur eliminimin.
“Final 4” i Ligës Unike u zhvillua në palestrën “Feti Borova”, ku në po të njëjtën palestër do të zhvillohet edhe finalja nga ora 18:00 të enjten.
Ndeshja për vend të tretë luhet nga ora 15:00, ku do të takohen Vëllaznimi dhe Besëlidhja.
Ky edicion i Ligës Unike ishte goxha i zbehtë, pasi u zhvillua në hije të garës shumë interesante të Superligës së Kosovës.
Në katër edicionet paraprake të Ligës Unike, kanë triumfuar skuadrat nga Kosova: Golden Eagle Ylli, Peja, Trepça dhe Vëllaznimi.
