Komisioni Qeveritar për Persona të Zhdukur ka dalë për herë të parë me një qëndrim, pasi Kosova dhe Serbia arritën pajtim për tekstin e deklaratës për personat e zhdukur gjatë luftës së fundit në Kosovë.
Nga ky komision kanë bërë të ditur se për herë të parë pas 24 vitesh kanë arritur ta imponojnë adresimin e drejtë të përgjegjësisë për të zhdukurit, si viktima të luftës që kërkojnë zgjidhje dhe drejtësi në bazë të konventave ndërkombëtare.
Komisioni po ashtu ka bërë të ditur se tani e tutje, do të ndryshohet termi ‘persona të zhdukur’.
“Prandaj më nuk do të ketë vetëm persona të zhdukur, por persona të zhdukur me dhunë nga shteti serb”, thuhet në komunikatë.
Po ashtu bëhet e ditur se me anë të kësaj deklarate Serbia detyrohet të marrë përsipër hapjen e arkivave dhe prezentimin e dokumenteve sekrete mbi vendndodhjen e personave të zhdukur me dhunë.
“Mbetet edhe shumë pune dhe përpjekje për tu bërë që të arrijmë në qëllimin tonë kryesor: Zbardhjen e fatit të personit të fundit të zhdukur me dhunë në Kosovë”, thuhet në fund të komunikatës.
