Kryeministri i Shqipërisë, Edi Rama ka thënë në një konferencë për shtyp se si kryeministri i Kosovës, Albin Kurti, ashtu edhe presidenti serb Vuçiq nuk poi kontribuojnë zgjidhjes së problemit të veriut.
“Duke parë që në vend së të ulen në tryezë, njëri çon policinë në godina bosh, tjetri çon ushtrinë për të kënduar këngë në kufi me Kosovën dhe të dy e dinë që as njëri e as tjetri nuk janë aty për ta zgjidhur problemin real që është problemi i gjithë marrëveshjes së normalizimit dhe i Asociacionit që është thelbi i kësaj marrëveshjeje”, ka thënë Rama.
Duke folur për kërkesat e ndërkombëtarëve – ai ka thënë se ata që quhen ndërkombëtarë janë të zotët e shtëpisë në Kosovë.
“Çfarë kërkojnë ata që në këtë rast unë nuk i quaj ndërkombëtarë. Unë nuk i quaj ndërkombëtarë. Ata janë të zotët e shtëpisë në Kosovë, si në asnjë vend tjetër. Sepse ata e kanë krijuar atë shtëpi me bomba dhe shumëçka kanë bërë për atë shtëpi. Për sa kohë ajo shtëpi nuk është plotësisht e njohur botërisht, ata ndërkombëtarët janë limfa vitale e asaj shtëpie. Në momentin që ata ndërkombëtarët i kthejnë shpinën asaj shtëpie, ajo shtëpi, mos ndodhtë kurrë, futet në ditët e veta më të zeza. Kjo është e vërteta”, ka thënë Rama në një konferencë për shtyp.
Rama: Një draft të Asociacionit ia kam dorëzuar BE-së e ShBA-së
