Sot mbushen pesë vjet kur në Kosovë u regjistrua personi i parë që ndërroi jetë si pasojë e sëmundjes infektuese koronavirus.
Instituti Kombëtar i Shëndetit Publik kishte njoftuar se bëhej fjalë për një pacient 82-vjeçar nga Dumnica e Podujevës, transmeton KosovaPress.
Prania e koronavirusit të ri për herë të parë u konfirmua në fund të dhjetorit 2019 në Kinë dhe më pas u përhap në pjesë të tjera të botës, duke shtyrë Organizatën Botërore të Shëndetësisë të shpallë gjendjen e pandemisë.
Edhe pesë vjet pas shpërthimit të koronavirusit origjina e tij mbetet mister.
Dolën dy hipoteza – virusi kaloi nga kafshët te njerëzit në një treg në Wuhan ose rrodhi rastësisht nga një laborator në këtë qytet.
Më 25 janar 2025, Agjencia Qendrore e Inteligjencës (CIA) tha në një deklaratë se virusi ka “më shumë gjasa” të ketë ardhur nga një laborator.
Njoftimi erdhi si një zhurmë për Kinën, e cila ka këmbëngulur prej kohësh se laboratori i Wuhan nuk ishte përgjegjës. Në përgjigje të përcaktimit të ri të CIA-s, qeveria kineze e dyfishoi këtë pozicion.
“SHBA-ja duhet të ndalojë menjëherë politizimin dhe armatimin e gjurmimit të origjinës, dhe të ndalojë së qeni kurban të tjerëve,” kishte deklaruar zëdhënësja e Ministrisë së Jashtme Mao Ning në një konferencë për shtyp.
COVID vazhdon të jetë i pranishëm në disa pjesë të botës edhe më 2025, ku sipas të dhënave zyrtare të OBSH-së deri më 2 mars janë regjistruar 2.800 raste të reja të vdekjes, prej tyre vetëm në SHBA 2.500. Pasojnë Suedia me 79, Rusia 67, Italia 48, Greqia 35, Portugalia 17, Kolumbia 9, Çekia 8, Irlanda 7, Lituania 5, Argjentina, Franca, Malta 4, Kili e Rumania 2 dhe Panamaja 1.
Gjithsej 777 milionë e 594 mijë e 331 raste në gjithë globin janë regjistruar deri më tash me COVID-19, prej tyre 7.1 milionë kanë vdekur – më së shumti në SHBA 1.2 milion. Në Kosovë janë regjistruar mbi 3 mijë e 200 viktima.
Vendet që nuk kanë raportuar asnjë rast të vdekjes nga COVID-19 deri më tash sipas OBSH-së janë Koreja Veriore, Ishujt Folkland, Holy See, Niue, Pitkern, Sent Helena, Tokelau dhe Turkmenistani. Në vetë vendin e shpërthimit të pandemisë- Kinë, janë raportuar 122 mijë vdekje.
