Komisioni Qendror Zgjedhor ka njoftuar se u ka kthyer përgjigje serbëve në lidhje me peticionin e tyre rreth kërkesës për shkarkimin e kryetarëve shqiptarë në komunat veriore.
Zëdhënësi i KQZ-së, Valmir Elezi gjatë ditës së sotme deklaroi se pas marrjes së këtyre shkresave, tha se ato janë duke u shqyrtuar dhe duke u përgatitur përgjigjja për to.
Derisa i njëjti për teve1.info konfirmoi se pas shqyrtimit të shkresave janë njoftuar dhe udhëzuar serbët që sipas akteve nënligjore të Ministrisë së Administrimit të Pushtetit Lokal , kërkesat e dorëzuara në KQZ t’i adresojnë tek autoritetet përkatëse, respektivisht tek Kryesuesi i Kuvendit Komunal në komunat përkatëse.
“Mund t’iu konfirmoj se shkresat të cilat i kemi pranuar më 5 dhjetor përmes e-mailit, janë shqyrtuar dhe u kemi kthyer përgjigje, me anë të të cilave i kemi njoftuar se sipas akteve nënligjore të Ministrisë së Administrimit të Pushtetit Lokal, kjo çështje duhet të adresohet tek Kryesuesi i Kuvendit Komunal në komunat përkatëse, andaj i kemi udhëzuar që kërkesat e dorëzuara në KQZ t’i adresojnë tek autoriteti kompetent”, tha Elezi për teve1.info
Ndryshe, gjatë ditës në djeshme ministri i Administrimit të Pushtetit Lokal, Elbert Krasniqi ka njoftuar se si Ministri nuk kanë pranuar asnjë njoftim zyrtar në lidhje me nismën nga Kryesuesit e Kuvendeve Komunale të Komunave.
“Jemi në dijeni rreth raportimeve në media se janë mbledhur nënshkrime nga ‘një grup nismëtar’. Megjithatë, ju njoftojmë se në Ministrinë e Administrimit të Pushtetit Lokal nuk kemi pranuar asnjë njoftim zyrtar në lidhje me këtë nismë nga Kryesuesit e Kuvendeve Komunale të Komunave respektive apo antarët e grupit inicues siç parashihet me këtë Udhëzim Administrativ”, tha ministri në reagimin e tij.
