I ftuar në “Ditari” në Tëvë 1, ai tregoi se personalisht nuk ishte keqtrajtuar nga gardianët e burgut, pasi që kishte ndër ta që kishin sjellje të mira me të burgosurit.
Madje, ai rrëfen edhe një rast të veçantë ku thotë se një gardian shqiptar u kishte ndihmuar atij dhe të burgosurve të tjerë që të koordinohen mes vete në mënyrë që të mos dënohen nga forcat serbe.
“Një gardian prej atyre jo të mirë po që kanë qenë super të mirë se ai ka sakrifikuar, ka rrezikuar edhe që të burgoset se na ka shërby jo vetëm mua ka qenë shqiptar quhet Rrahim Topanica ka qenë gardian i mrekullueshëm. Mua personalisht më ka ndihmuar sepse ishte faza e hetimeve tash gjithmonë i burgosuri luftën e bën që mos të vij një shok brenda që ta këpus disi at zingjirin që e ka punë futjen dhe dojnë me i zgjeru hetimet personat tjerë që lidhen me atë vepër ose me grupin ilegal kështu që isha në siklet të madh sepse e kishin nuhatur një tubim që kishim pasur në fshatin tim në Dyz dhe tash prisja unë që cka do të ndodh dhe të dhimbseshin ata shokë që kanë qenë në takim”, tha ai.
Berisha tregon se gardiani shqiptar u kishte shkëmbyer letrat mes të burgosurve dhe udhëheqësve të grupeve ilegale që ishin jashtë burgut për të zhvilluar aksione të ndryshme.
“Kështu që Rrahimi për fat të mirë ka mundur të mos qëllojë në ndërrim, ai qëlloi për fat të mirë të atyre shokëve të mi dhe ai më solli letër dhe laps në dhomë dhe unë e shkruva gjithë ku është faza e hetimeve çka duan hetuesit dhe çka nuk është zbuluar dhe çka nuk dijnë. Jo vetëm që ma solli lapsin e letrën por edhe atë natë e ka dërguar letrën te personi i caktuar tash dëshmor, Jetullah Islami dhe ia ka dorëzuar kështu që në atë takim ka qenë edhe profesor Mehmet Breznica”, shtoi ai.
Tutje, ish i burgosuri bëri të ditur se e ka takuar edhe pas përfundimit të luftës gardianin i cili u ndihmoi atyre, duke thënë se në atë kohë gjesti i tij ishte shumë madhështor, i guximshëm e human./teve1.info/
