Deputeti i PDK-së, Mërgim Lushtaku ka reaguar pas përleshjeve në Kuvendin e Kosovës e në të cilat u përfshi edhe personalisht.
Lushtaku fillimisht ka thënë se do të qëndrojë i fortë në çdo aksion politik dhe demokratik.
“Është pak e rëndësishme apo do të më godasin apo do të më vrasin sepse kam me qëndru i fortë, siç ka qëndru edhe familja ime në kohën ma të vështirë, në kohën e okupimit serb. Kam me qëndru i fortë sepse me krenari e kena mbrojtë çdo pëllëmbë të tokës së Kosovës. Kemi me qëndru të fortë dhe të qëndrueshëm në çdo aksion politik dhe demokratik. Edhe pse mundohen me na ndalë fjalën e lirë dhe aktivitetet demokratike, ata kurrë nuk do të mujnë me na ndalë…Kjo Qeveri është Qeveri Zdravo, është në interes të Serbisë dhe Rusisë dhe në këtë frymë sigurisht nuk kemi prit që një zv/kryemnistër të dhunojë demokracinë dhe të sulmojë siç e keni pa të gjithë mediat dhe të gjithë qytetarët”, ka thënë Lushtaku.
Lushtaku e ka thënë versionin e tij për përleshjen. Sipas deputetit, veprimi i tij ka qenë politik teksa ai është sulmuar nga zv/kryeministri Bislimi, ministri i Financave Murati dhe ajo e Drejtësisë, Haxhiu.
Lushtaku ka paralajmëruar padi ndaj të lartpërmendurve.
“Unë duke pa të gjitha këto sulme që janë ba në drejtim timin por edhe kolegëve ku fizikisht jam gjuajtur me shishe plotë me ujë nga zv/kryeministri Bislimi, nga Albulena Haxhiu shihet qartë që ka pasë një sulm, ka ardhë me tentim për të më shtyer, pastaj edhe nga ministri i Financave që ishte me një mjet të fortë, pas atij sulmi unë natyrshëm ka reagu. Asnjëherë nuk kisha në plan të kem reagim të dhunshëm, veprimi im ka qenë politik dhe si i tillë vetëm kam vepru me një gjuajtje të ujit, besoj se të gjithë kanë nevojë për freskim e sidomos kjo Qeveri po i konvenon Serbisë dhe Rusisë sesa vet Kosovës. Unë do t’i padisë këta njerëz të sipërpërmendur dhe sigurisht organet kompetente do ta japin verdiktin e tyre”, ka thënë Lushtaku për media.
