Ish-zëdhënësi i UÇK-së, Jakup Krasniqi ka folur për angazhimin e tij në LDK.
Ai ka thënë se menjëherë pas kthimit në Kosovë u angazhua në kuadër të strukturave të LDK-së në Drenas.
“Menjëherë pas kthimit në Kosovë u angazhova në kuadër të strukurave të LDK-së në Drenas. Në atë kohë LDK angazhohej që të organzionte një sistem funksional paralel të jetës politike dhe institucionale në Kosovë, për t’i zbutuar pasojat e politikës së aparteidit të instaluar nga regjimi i Beogradit”.
“Si kuadër i LDK kam udhëhequr këshillin e financave në Drenas ndërsa nga prilli i 1996 e deri më 1998 kam qenë kryetar i këshillit për arsim në Drenas. Kam qenë edhe kryetar i degës së LDK-së në Drenas që kam ushtruar nga fundi i 1997 deri në prill 1998, funksion që më mbante në kontakjt ta vazhdueshëm me strukturat udhëheqëse të LDK-së”, ka deklaruar Krasniqi.
Tutje i ka quajtur absurde akuzat për persekutimin e anëtarëve të LDK-së.
“Është absurd që të akuzohem për persekutimin e anëtarëve të LDK-së ose si pjesë e një qëllimi të përbashkët për ta sulmuar LDK-në. Unë vet isha anëtar i saj, familjarët, bashkëveprimtarët dhe bashkëluftëtarët ishin anëtarë të LDK-së. Vetëm një mendje e çoroditur mund të ketë lindur ideja se mund të kem qenë pjesë e persekutimit tim, të familjarëve, bashkëluftëtarëve e bashkëveprimtarëve të mi”, ka thënë Krasniqi.
