Kylian Mbappe është sërish në qendër të kritikave dhe kësaj here është Jerome Rothen, ish-lojtar i përfaqësueses franceze dhe tashmë analist në RMC Sport, që nuk i ka kursyer fjalët ndaj sulmuesit të Real Madridit. Pasi eliminimit të “Los Blancos” nga Arsenali në çerekfinalet e Champions League, Rothen e cilësoi performancën e francezit si zhgënjyese dhe shumë larg pritshmërive.
“Mbappé shkoi në klubin e ëndrrave të tij me ambicien për të fituar gjithçka, përfshirë Champions League, dhe për të hyrë mes më të mirëve në botë për të fituar Topin e Artë. Por si në aspektin individual, ashtu edhe në atë kolektiv, është një dështim i vërtetë”, u shpreh Rothen në emisionin “Rothen s’enflamme”.
Ai shtoi se këtë sezon Mbappe nuk ka për ta fituar Topin e Artë:“Në fillim të sezonit pati disa justifikime, i u la kohë për t’u ambientuar.
Por kur je Mbappé, nuk ke shumë kohë për t’u përshtatur. Edhe pse ka shënuar shumë gola, loja e tij është katastrofike. Nuk funksionon me ekipin, duhet të kuptohet më mirë me shokët e skuadrës.”
Rothen nuk kurseu kritika as për ndeshjen e kthimit kundër Arsenalit, ku Real Madridi u mund 2-1. “Ishte inekzistent. Ai duhej të ishte i përsosur në të gjitha aspektet. Qëndrimi i tij është i tmerrshëm, nuk përputhet me deklaratat që jep. Nuk ka asgjë, është bosh.
Nuk mund të thuash që ky sezon është një sukses. I uroj më të mirën, por bilanci i tij është i tmerrshëm këtë vit.”
Fjalë të rënda nga një zë që e njeh mirë ambientin e futbollit francez dhe që pa dyshim do nxisin debat për të ardhmen dhe imazhin e njërit prej emrave më të mëdhenj në skenën ndërkombëtare.
