Facebook dhe Instagram janë ndër dy platformat më të përdorura të teknologjisë, të cilat për shumicën e njerëzve janë kthyer në varësi, kryesisht për fëmijët.
Pikërisht për këtë arsye 41 shtete kanë vendosur të padisin META- n duke pretenduar se është kthyer në varësi shkatërruese. Ata ngrenë shqetësimin se fëmijëve nën 13 vjeç, u merren informacione personale pa miratimin e prindërve.
Ndërkohë nga ana tjetër një padi federale dhe padi shtetërore pretendojnë se gjigandi i teknologjisë në mënyrë të qëllimshme ka projektuar funksionalitete në platformë me synimin që fëmijët dhe adoleshentët të vetëvriten.
“Motivi i tyre është fitimi dhe në përpjekje për të maksimizuar përfitimet financiare, Meta ka mashtruar vazhdimisht publikun në lidhje me rreziqet thelbësore të platformave të saj të mediave sociale”, shkruhet në padi.
“Fëmijët dhe adoleshentët po vuajnë nga nivele rekord të shëndetit të dobët mendor dhe kompanitë e mediave sociale si Meta janë fajtorë”, tha Prokurorja e Përgjithshme e New York-ut, Letitia James.
“Ne ndajmë angazhimin e prokurorëve të përgjithshëm për t’u ofruar adoleshentëve përvoja të sigurta dhe pozitive në internet dhe kemi prezantuar tashmë mbi 30 mjete për të mbështetur adoleshentët dhe familjet e tyre. Jemi të zhgënjyer që në vend që të punojmë produktivisht me kompanitë në të gjithë industrinë për të krijuar standarde të qarta, të përshtatshme për moshën për shumë aplikacione që përdorin adoleshentët, prokurorët e përgjithshëm kanë zgjedhur këtë rrugë’, u shpreh në një deklaratë zëdhënësi i META-s.
