Autori: Jona Kelmendi
Në këtë vend, në fshatin Hajvali të Prishtinës, dheu po gërmohet sërish.
Kjo pasi që nën tokë janë gjetur mbetje mortore që dyshohet se i përkasin katër personave të zhdukur nga lufta e fundit në Kosovë.
Procesin e zhvarrimit e përcolli edhe kryesuesi i komisionit për personat e zhdukur, Andin Hoti, i cili tha që gërmimet janë bërë në 24 lokacione deri më tani, ndërkohë në 12 prej tyre janë hasur mbetje mortore që dyshohet të jenë të personave të zhdukur.
“Kjo nuk do të thotë që patjetër këta persona janë persona të zhdukur. Këtë e thotë patjetër vetëm kur vjen raporti i ADN-së. Lokacioni i fundit i 24 që sot po gërmohet, nuk është i fundit për këtë vit, vjen si rezultat i disa analizave dhe raporteve edhe një bashkëpunimi të mirëfilltë që kemi me organizatat ndërkombëtare dhe Kryqin e Kuq. Në këtë lokacion kemi arrit me i gjetë nuk po them që janë persona të zhdukur patjetër, mbetjet mortore të 4 personave”,ka thënë Hoti.
Kushtrim Gara nga Komisioni Qeveritar për Personat e Zhdukur tha që gërmimet të tilla në këtë lokacion janë bërë edhe me parë.
“Në këtë lokacion jemi rikthyer, kjo do të thotë se ky lokacion është trajtuar më parë, trajtimi i parë ka ndodhur muajt e parë të pasluftës, tetor të ’99-tës, dhe në bazë të këtyre të dhënave dhe bazë të të dhënave të arkivave ndërkombëtare, falë mbështetjes edhe të partnerëve ndërkombëtarë, të dhëna këto të shqyrtuara, kemi konkluduar që ne duhet të ri kthehemi në këtë lokacion”,është shprehur Gara.
E Ditor Haliti nga Instituti i Mjekësisë Ligjore tha që nëse do të ketë identifikim pozitiv të mbetjeve, atëherë ato do të vazhdojnë me procesin e identifikimit.
“Mbetjet mortore do ti dërgojmë në institutin e mjekësisë ligjore ku do ti nënshtrohen ekzaminimeve mjeku-ligjore dhe procesit të identifikimit”, thënë Haliti.
Punimet në këtë lokacion janë duke vazhduar nën mbikëqyrjen e komisionit qeveritar për personat e zhdukur, policisë dhe ekspertëve ndërkombëtarë.
Të zhdukurit gjatë luftës në Kosovë përfshijnë një numër prej rreth 6000 personave, nga të cilët rreth 1600 persona ende nuk janë gjetur.
