Që katër muaj, inspektorët sanitar në regjionin e Mitrovicës kanë mbetur në rrugë.
Pa zyre, vetura e kushte të punës, janë duke punuar 8 inspektorë të cilët janë në kuadër të Ministrisë së Shëndetësisë.
Në kushte anonime, një nga këta inspektorë tregoi për tëvë1 gjendjen në të cilën janë që nga muaji dhjetor.
“Në takimin e fundit që kemi pasur me sekretarin e Ministrisë së Shëndetësisë, Naim Bardiqin, na ka thënë që komplet keni me u bartë në Prishtinë. Ne e kemi kundërshtuar fillimisht e tash këto problemet e formimit të institucioneve… por ne kemi mbet në rrugë kryesore, as nuk kemi kerre as nuk kemi zyre as nuk kemi mjete të punës”, thuhet nga inspektorati sanitar.
Madje ata thonë se shpeshherë detyrohen që punën ta kryejnë me vetura personale.
“Gjithë ditën vetëm rrugëve as nuk e dimë kur lajmërohem as kur shkojmë veç kur po na thërrasin kryetarët në veri po vijnë po na marrin me veturat e tyre zyrtare. Një pëlqim sanitar dikush më kërku ose duhet ardhë me na marrë me veturën e vet që është e jashtëligjshme ose ne duhet të shkojmë me tonat personale. Që katër muaj jemi në këtë gjendje”.
E nga Ministria, në një përgjigje me shkrim kanë treguar se kur pritet që këta inspektorë të bëhen me zyre e me vetura.
“Ju njoftojmë se inspektorët kanë refuzuar kërkesën për sigurimin e zyrave të punës për ta. Megjithatë, aktualisht zyrat janë siguruar dhe tani pritet akomodimi i tyre. Agjencia Qendrore e Prokurimit Publik ka nënshkruar kontratë për furnizimin me vetura zyrtare për nivelin qeveritar, duke përfshirë këtu edhe Ministrinë e Shëndetësisë dhe furnizimi me vetura pritet të realizohet brenda një muaji”, thuhet nga MSH.
Inspektorët të cilët janë aktualisht në mungesë të zyrave e të veturave janë nga Komuna e Mitrovicës, Vushtrrisë e Skenderajt.
