Gexha-Bunjaku deklaroi se rreziku eksiziston që lia e majmunëve të shfaqet në Kosovë, pasi që në rajon janë konfirmuar rastet e para, duke bërë apel që të gjithë ata që kanë simptoma si ethe, lodhje, dhimbje muskujsh të drejtohen tek mjeku familjar, raporton teve1.info
“Duke qenë se rastet e para janë konfirmuar në rajon, rreziku që të shfaqet edhe në Kosovë është real. Andaj për çdo ndryshim në lëkurë e simptoma tjera si ethe, dhimbje muskujsh e lodhje luteni t’i drejtoheni mjekut familjar”, tha ajo.
Gexha-Bunjaku dhe drejtori i Institutit Kombëtar të Shëndetësisë Publike të Kosovës, Naser Ramadani, kanë thënë se Kosova po monitoron masat që po ndërmarrin shtetet tjera që po përballem me këtë infeksion.
Tutje ajo e ka quajtur lajm të mirë faktin që shpejtësia e përhapjes së lijës së majmunëve nuk është sikur e Covid-19.
“Në bazë të të dhënave, nuk ka deri më tani person të dyshuar për këtë li. MSH-ja po e monitoron situatën dhe po përgatit rekomandime. Duke qenë se rastet e para janë konfirmuar në rajon e botë, rreziku që të përhapet edhe në Kosovë është eventual. Lajm të mirë përbën fakti që shpejtësia e përhapjes s’është sikur e COVID-19. Jemi duke shikuar masat që po ndërmerren nga shtetet tjera”, ka thënë Gexha-Bunjaku në një konferencë për media sot.
