Gjykata Themelore në Prishtinë ka bërë të ditur arsyen e caktimit të paraburgimit një muaj për serbin e arrestuar nën dyshimin për kryerjen e veprave penale Bashkimi për veprimtari kundër kushtetuese, Rrezikimi i personave nën mbrojtje ndërkombëtare, Pjesëmarrja në turmë që kryen vepër penale dhe huliganizmi dhe veprën penale Sulmi ndaj personit zyrtar.
Në komunikatën e Gjykatës thuhet se ekzistojnë kushtet dhe arsyet ligjore për caktimin e paraburgimit ndaj të dyshuarit.
“Gjykata ka vlerësuar se ekzistojnë kushtet dhe arsyet ligjore për caktimin e paraburgimit, duke marrë parasysh mënyrën dhe rrethanat në të cilat janë kryer veprat penale, veçanërisht rrezikshmërinë shoqërore të veprave penale, pasojat nga të cilat janë lënduar shumë pjesëtar të KFOR-it, zyrtarë policorë, gazetarë e qytetarë të tjerë, si dhe dëmet materiale të shumta nga djegia dhe dëmtimi fizik, tregon mjaftueshëm se i pandehuri nëse lihet që të mbrohet në liri do të tentojë që të ndryshojë provat e veprës penale, duke ndikuar në të dyshuarit e tjerë të cilët gjenden të lirë si dhe dëshmitarët tjerë eventualë, po ashtu në rastin konkret ekziston edhe rreziku i ikjes së të pandehurit, i njëjti lehtë mund të arratiset duke marrë në konsideratë faktin se i pandehuri S.M është shtetas edhe i Serbisë dhe nëse lihet në liri, mund të arratisët, andaj në këtë rast caktimi i paraburgimit është i domosdoshëm dhe më se i arsyeshëm”, thuhet në komunikatë, përcjell teve1.info
Gjykata ka thënë se i dyshuari bashkë me një grup të dyshuar ka marrë pjesë në protestën e dhunshme në Zveçan më 29 maj të vitit të kaluar duke sulmuar duke sulmuar pjesëtarë të KFOR-it dhe pjesëtarë të Policisë së Kosovës.
Ai poashtu dyshohet se ka tentuar të bllokojë ventilimin e veturës së Policisë së Kosovës brenda të cilës gjendeshin të ngujuar disa policë duke rrezikuar seriozisht jetën e tyre.
“I pandehuri S.M dyshohet se me një grup të dyshuar ka qenë pjesëmarrës i protestave të organizuara me datë 29.05.2023 para objektit të Komunës se Zveçanit, duke sulmuar pjesëtarë të KFOR-it dhe pjesëtarë të Policisë së Kosovës si dhe duke përdorur shkumë ka tentuar të bëjë bllokimin e ventilimit të veturës së Policisë në të cilën në ato momente gjendeshin të ngujuar brenda në veturë zyrtarë policorë, e qëllimi i të pandehurit ka qenë që këtyre zyrtarëve policorë t’ju ndalet furnizimi me oksigjen duke rrezikuar seriozisht jetën e zyrtarëve policorë, me çka nga veprimet e këtij të pandehuri përmbushën të gjitha elementet e veprave penale për të cilat dyshohet”, thuhet në njoftim.
S.M, 30- vjeç është arrestuar në Jarinjë nga Policia e Kosovës dy ditë më parë.
