Sindikata e Policisë së Kosovës i ka kërkuar Avokatit të Popullit që Ligjin për paga ta dërgojë në Gjykatën Kushtetuese.
Përmes letrës kjo sindikatë ka thënë se ky ligji në disa dispozita cenon parimin e barazisë. Sindikata ka dhënë edhe disa vërejtje sa i përket trajtimin të policëve që kanë të bëjnë me kushtet specifike të punës, si shtesat, rrezikshmëria.
“Për më shumë Ligji për Paga nuk saktëson se në çfarë përqindje shuma e dedikuar për shtesën e rrezikshmërisë do t’i ndahet Policisë së Kosovës, sepse shuma prej 1% është e paraparë për të gjitha institucionet e Kosovës. Kjo nuk garanton siguri juridike të trajtimit me ligj të një të drejte të të punësuarve ashtu siç është kompensimi për jetën dhe shëndetin. Siç shihet kjo shtesë do të jetë simbolike në raport me rrezikimin e jetës dhe shëndetit të zyrtarëve të PK-së si dhe do të ndikojë negativisht në të ardhurat neto për zyrtarët në disa kategori. Në kuadër të Policisë së Kosovës janë 8704 personel policorë dhe në kuadër të këtij numri 7792 janë zyrtarë të uniformuar. Nëse kjo shumë ndahet tek të gjithë zyrtarët e uniformuar në mënyrë të barabartë i bie se për pagën bazë të zyrtarit policor të lartë mund të jetë rreth 10 për qind e pagës në muaj. Kjo është një shumë e ulët dhe e padrejtë në raport me rrezikun për jetën dhe shëndetin”, thuhet në letrën e Sindikatës së Policisë dërguar tek Institucioni i Avokatit të Popullit.
Ligji për paga ka ngjallë pakënaqësi edhe të punëtorë tjerë në sektorin publik, si atë të shëndetësisë. Dërgim në Kushtetuese të këtij Ligji ka paralajmëruar edhe Këshilli Prokurorial i Kosovës.
Edhe opozita ka kundërshtuar këtë Ligj për shkak të koeficientit për pagë prej 105 euro të miratuar nga Qeveria e Kosovës javën e kaluar./teve1.info./
