Një nga një u tubuan në sheshin “Car Llazari” në Mitrovicën Veriore.
Të njëjtit, kësaj here protestuan kundër Listës Serbe dhe presidentit serb Aleksandar Vuçiq.
Këta protestues serbë, u shprehën të zhgënjyer sepse sipas tyre Vuçiq është tërhequr nga barrikadat, pa u plotësuar të gjitha kërkesat e tyre.
Porosia e tyre ishte që Vuçiq me politikën e tij dhe Lista Serbe, nuk përfaqësojnë më serbët e Kosovës.
“Kryetar, ngrijë bisedimet, i ke pasur barrikadat si adut për t’u tërhequr ROSU-ja nga veriu, i ke larguar barrikadat, nuk e di pse, askënd pa e pyetur…Do të thotë ky ka qenë vendim i Listës serbe dhe Aleksandar Vuçiqit Duam që zëri ynë të dëgjohet. Neve më Lista serbe nuk mund të na përfaqësojë, as politika e këtillë e Aleksandar Vuçiqit”, ka thënë Nebojsha Joviq – kryetar i të ashtuquajturës Lëvizja për Mbrojtjen e Kosovës.
Joviq poashtu akuzoi Listën Serbe se është pasuruar duke marrë nga 6-7 paga.
Edhe protestues të tjerë nga e ashtuquajtura “Lëvizja për Mbrojtjen e Kosovës”, shprehën kërkesat e tyre.
“Kemi ardhur këtu për te bere pyetjen pse u hoqen barrikadat, kur kërkesa tona nuk u plotësuan, kështu që kërkesa themelore ishte lirimi i vëllezërve tanë që u arrestuan padrejtësisht e nuk u liruan është liruar vetëm Dejan Pantiq…”, tha Miletiq protestues.
“Nga Bashkësia Ndërkombëtare kërkojmë, insistojmë kryesisht tek KFOR-i dhe EULEX-i, që t’i kryejnë detyrat në kuadër të kompetencave të tyre, dhe të punojnë atë për çka kanë ardhur”, u shpreh Milenkoviq, protestues.
Protesta e cila zgjati afro një orë ishte e qetë pa ndonjë incident.
Nga afër forca të shtuara të sigurisë, KFOR-i, EULEX-i, si dhe pjesëtarë të Policisë së Kosovës, kanë vëzhguar situatën.
Kronika e realizuar nga Doresa Geci