Hyri në dyqan për të blerë gjëra ushqimore. E për të bërë pagesën, qytetari serb nga kuleta nxori kartëmonedhën prej 100 eurosh.
Ndonëse në arkën e dyqanit pati edhe dinarë, kthimi i kusurit iu bë e gjitha me euro.
Të mërkurën edhe qytetarë tjerë serbë të Graçanicës, pagesat i bënë me euro.
E gjithë kjo, ende pa filluar zbatimi i vendimit të Bankës Qendrore të Kosovës që ndalimin e dinarit në treg.
Mirëpo, ndonëse nuk ka dinarë me vete, Nebojsha Iviç thotë se ende varet nga kjo valutë.
Prandaj vendimi i BQK-së nuk duket të jetë i mirë për të.
“Nuk është mirë sepse tregtia e pagesave dhe mungesa e dinarit këtu, vetëm sa do të ndalojë ekzistencën tonë themelore. Shumica prej neve që jetojmë këtu varemi nga dinari. Unë marr pagën në dinarë dhe për momentin nuk kam dinarë. Dhe e kam të pamundur të drejtën themelore për blerjen e artikujve për jetesë”, thotë qytetari, Nebojsha Ivic
Ai madje thekson se në këmbimoren ku punon – edhe shqiptarët që jetojnë në Graçanicë, dinarët po i kthejnë në euro.
“Edhe shqiptarët pranojnë dinarë. Shqiptarët marrin pensionet në dinarë. Të gjithë vijnë dhe i marrin dhe i marrin pensionet në dinarë. Pastaj vijnë në këmbimore për euro, te unë”, thotë ai.
Ndërsa Millodraga Dëvarnoviç tregon se paratë tashmë po i këmbejnë në postën e qytetit.
“Komerciala Banka tek Kisha është mshelë, qetash veç po punon posta, po u japim dinarët edhe po i ndrron me euro”, tha ai.
Vendimi i BQK-së për përjashtimin e pagesave me dinarë në Kosovë, parashihet të fillojë nga një shkurti. Por që po kundërshtohet si nga Serbia ashtu edhe nga komuniteti ndërkombëtar. Këta të fundit pavarësisht që po e konsiderojnë të drejtë, po kërkojnë që të shtyhet ky vendim.
