Posta e Kosovës, ka njoftuar se SMS-të në të cilat palë të panjohura, në emër të këtij institucioni, u kërkojnë të dhëna personale ose kartela bankare qytetarëve, janë shfaqur sërish.
Përmes njoftimit, u është bërë thirrje të gjithë qytetarëve e që të mos bien pre e këtij mashtrimi, duke klikuar në linqet e dërguara nga këto mesazhe, apo duke bashkëpunuar me numra që nuk janë të Postës së Kosovës.
Po ashtu, Posta ka bërë të ditur se lidhur me këtë janë informuar organet kompetente dhe po bashkëpunohet me to për zbardhjen e rastit.
“Posta e Kosovës njofton publikun që të mos bjerë pre e një mashtrimi. Palë të panjohura u kanë dërguar edhe sot SMS qytetarëve, duke u paraqitur në emrin e Postës së Kosovës. Menjëherë pasi është njoftuar për këtë, Posta e Kosovës ka informuar organet kompetente dhe po bashkëpunon me to. Të nderuar qytetarë, ju lutëm mos klikoni asnjë link të dërguar përmes këtyre mesazheve dhe të mos bashkëpunoni me numra që nuk janë të Postës së Kosovës. Në asnjë rast, Posta e Kosovës nuk do t’ju kërkojë të dhëna personale apo numër kartele bankare. Edhe posta të tjera në rajon janë sulmuar nga keqbërës të ngjashëm. Posta e Kosovës është e përkushtuar për t’i mbrojtur qytetarët dhe për të bashkëpunuar me organet relevante”, thuhet në njoftim.
Mesazhe të tilla qytetarëve u janë dërguar edhe dy muaj më parë./teve1.info/
