Minatorët e Trepçës kanë hyrë në dytën e dytë të grevës.
E disa nga ta kanë filluar të kenë edhe probleme shëndetësore.
Njëri nga ta ishte edhe Rizan Baliu.
“N’9 ora n’mramje m’u keqësu gjendja. Falë mjekëve që ken k’tu, në intervenim të shpejt jam dalë jashtë, më dhanë një ineksion, pastaj kam shku në emergjencë poshtë e kam marr edhe një infuzion, falë Zotit tash, s’jam bash mirë po për mos me i lanë kolegët, për qata jam ardhë. Të gjithë kemi familje, të gjithë kemi pasë probleme për te shpia, rroga s’kemi pasë, me ua siguru fëmijëve bukën s’kemi pasë”, ka thënë ai.
E në gjendje jo të mirë është edhe Fehmi Hajredini.
“Unë jam edhe pak i moshum, të 60-tat, pak me mundim por po duhet me sakrifiku kaniherë edhe shëndetin. Ndikon shumë, sidomos që jemi me presion të gjakut, ndikon shumë”, shprehet Hajredini
60 vjeçari ishte pjesëmarrës edhe në grevën e minatorëve viteve 90-ta, ndërsa shprehet i zhgënjyer me mos interesimin e qeverisë.
“Unë jam edhe pjesëmarrës i grevës së viteve 90-ta, e në marshet që kanë qenë, por qeveria mos me u interesu nuk ka ndodhë, sidomos për klasën punëtore. Veten e ndij shumë të zhgënjym, n’këtë kohë, n’moshë timen me u merr prap me gjana që nuk u dashtë me u merr”, thotë ai.
Krahas këtyre vetëm brenda 24 orëve, dhjetëra minatorë morën ndihmë mjekësore.
“Dy punëtorë i kemi transportua për në spital, kurse 50 kanë marrë tretman këtu dhe nuk kanë pranu të dalin jashtë”, thotë Jashari.
Grevistët po kërkojnë takim me krerët e institucioneve për t’ia shprehur pakënaqësitë. Teksa kanë treguar që një pjesë e pagës do i del sot.
“Pjesa e mbetur e pagës sot do të del, ashtu e kam edhe njoftim, kemi bërë thirrje tek të gjitha institucionet që të vijnë dhe t’i vizitojnë, kemi bërë edhe shkresa, kam bërë disa njoftime për kërkesat e tyre edhe nga bordi por fatkeqësisht momentalisht nuk kemi pasur ndonjë vizitë nga ana e bordit apo ndonjë qeveritari tonë”, shprehet Jashari.
Por cilat janë kërkesat e minatorëve të Trepçës?
“Marrja e pagës me kohë nga data 6 deri me datën 10, kushtet shëndetësore dhe shkarkimi i menaxhmentit sepse e shohim si përgjegjës për këto sepse për aq sa kanë menaxhuar ata ne kemi shkuar në humbje. Ne nuk jemi lëmoshë kërkues, ne duam djersën tonë të paguhet me djersën tonë, me punën tonë”, thotë Ibrahim Jonuzi nga sindikata e punëtorëve të Trepçës.
Megjithatë, minatorët theksojnë se kërkesat për kushtet e punës nuk u janë marrë parasysh asnjëherë.
Televizioni ka tentuar të marrë një qëndrim edhe nga ushtruesi i detyrës së kryeshefit ekzekutiv të Trepçës, Enis Abdurrhamni, por i njëjti nuk ka qenë i qasshëm.
Kurse Qeveria e Kosovës gjatë të hënës ka ndarë mbi 1 milion e 600 mijë euro për pagat e punëtorëve të Ndërmarrjes Publike ‘’Trepça’’.