Ish-drejtori i Qendrës për Punë Sociale në Prishtinë, Vebi Mujku, ka reaguar pas ndalimit që i është bërë dy ditë më parë nga Prokuroria e Shtetit, nën dyshimin për keqpërdorim të pozitës.
Mujku, thotë se publikimet në media janë bërë qëllimshëm për njollosje nga individë të caktuar.
“Ajo çfarë është publikuar në medie këto dy ditë, është vetëm tentim i qëllimshëm për njëllosje nga individë të caktuar. Sot do të kursehem e do të mjaftohem duke thënë se e drejta për tu hetuar secili është e padiskutueshme dhe do ta përkrahi deri në momentin e fundit”, ka shkruar ai në Facebook.
Ai është deklaruar i pastër nga këto akuza, duke thënë se fjalën e fundit do ta vendos drejtësia.
“Përderisa për ato që është shkruar, mund të them se jam i pastërt si loti, për çka fjalën e fundit do ta thotë drejtësia. Vullneti, tentimi apo fuqia ime për të ndikuar në drejtësi është zero. Nuk do të ndalem në shërbim të drejtë dhe me integritet për vendin nga cilado pozitë që jam, sepse e kemi obligim profesional dhe moral”, ka shkruar mes tjerash zyrtari.
Mujku, është ndaluar nga Prokuroria Themelore në Prishtinë, nën dyshimin se bashkë me dy zyrtarë të tjerë kanë punësuar rreth 10 persona në Qendrën për Punë Sociale.
Lidhur me këtë rast ka reaguar edhe ministrja e Drejtësisë, Albulena Haxhiu, e cila ka thënë e rasti lidhet me dhunimin e 11-vjeçares.
Haxhiu, ka shkruar se personi përgjegjës që ishte caktuar menaxher për rastin e 11-vjeçares nuk ishte i lincensuar nga Ministria e Drejtësisë.
“Vlerësoj trajtimin serioz të këtij rasti, nga ana e policisë dhe prokurorisë. Çdo zyrtar publik sikurse edhe ne, e kemi për obligim zbatimin e përgjegjësive sipas legjislacionit në fuqi dhe sidomos në rastet kur bëhet fjalë për fëmijë të mitur. Qendrat për punë sociale do ta kenë mbështetjen tonë por assesi shkeljet nuk do t’i tolerojmë”, kishte shkruar ajo në Facebook.
Gjithashtu, lidhur me rastin ka deklaruar se është intervistuar edhe vetë nënkryetari i Komunës së Prishtinës, Alban Zogaj, duke thënë se rasti ndërlidhet me nënshkrimin e disa kontratave mi vepër. Ky rast ndërlidhet me nënshkrimin e disa kontratave mbi vepër, të cilat ne si qeverisje i kemi trashëguar nga qeverisja e kaluar”, ka shkruar Zogaj./teve1.info/
