Analisti, Shkodran Ramadani, thotë se Ministrja e Punëve të Jashtme, Donika Gërvalla, do të duhej të përjashtohet nga Qeveria, pasi sipas tij, ajo s’ka bërë asnjë lëvizje drejt afirmimit të shtetësisë së Kosovës.
Madje, Ramadani vlerësoi që Kosova ka kohë të gjatë që ka stagnuar, duke përmendur këtu mos anëtarësimin e saj nëpër organizata ndërkombëtare.
“Nëse do ta përdorim analogjinë e studimeve, ajo do të duhej të përjashtohej nga fakulteti, sepse s’ka asnjë arritje, asnjë sukses, asnjë dëshmi që ajo ka bërë ndonjë lëvizje pozitive drejt afirmimit të shtetësisë së Kosovës dhe subjektivitetit ndërkombëtar të Republikës së Kosovës. Kosova s’ka fituar asnjë njohje, s’është anëtarësuar në asnjë organizatë ndërkombëtare. Përkundrazi, Kosova që një kohë të gjatë ka stagnuar dhe ka trend negativ”, deklaroi Ramadani në emisionin “Infonata”.
Po ashtu, Ramadani ka thënë që Gërvalla është pjesë e një qeverie e cila ka tensionuar në maksimum raportet me partnerët ndërkombëtar./teve1.info/.
