Prokuroria Themelore në Gjilan ka kërkuar paraburgim për një kirurg dhe një anesteziolog në Gjilan për marrje ryshfeti.
Sipas komunikatës së Prokurorisë thuhet se pandehurit H.B. dhe L.M., dyshohet se në bashkëkryerje kanë kryer veprën penale ‘’Marrja e ryshfetit’’, nga neni 421 paragrafi 1 lidhur me nenin 31 të Kodit Penal të Republikës së Kosovës.
“Sipas kërkesës, ekziston dyshimi i bazuar se më 29 Prill 2023, rreth orës 19:45 minuta, në Spitalin e Përgjithshëm të Gjilanit, të pandehurit H.B. dhe L.M., me qëllim të përfitimit të kundërligjshëm pasuror, si persona zyrtar, kanë përfituar për vete, në atë mënyrë që i pandehuri H.B. – anesteziolog, me rastin e operimit të pacientes, M.S., në repartin e kirurgjisë, ka kërkuar dhe marrë para nga familjarët e saj”, thuhet në komunikatë, përcjell teve1.info
Gjithashtu, edhe i pandehuri L.M. – mjek kirurg, me rastin e operimit të pacientes së lartshënuar ka pranuar para nga familjarët e të njëjtës.
Mjeku kirurg dyshohet se ka marrë 330 euro dhe ka kërkuar edhe 200 shtesë për ta kryer ndërhyrjen ndërsa mjeku anesteziolog po ashtu dyshohet se ka kërkuar 100 euro.
Të dyshuarit janë arrestuar nga Policia e Kosovës të dielën./teve1.info/
