Valon Prestreshi, ish- kryetar i Autoritetit Kosovar të Konkurrencës, në Tëvë1 foli rreth ndërhyrjes së shtetit në caktimin e marzhën e fitimit për naftëtarët.
Prestreshi tha se kjo ndërhyrje e shtetit mund të jetë devijim i nenit 10 të Kushtetutës së Kosovës.
“Vlerësoj se ndërhyrja e shtetit në caktimin e margjinës së fitimit apo caktimin e çmimit blerës për ndërmarrjet mund të jetë devijimi i nenit 10 të Kushtetutës së Republikës së Kosovës e cila është ekonomi e tregut mbi konkurrencë”, tha ai.
Prestreshi në emisionin “Ditari” tha se me caktimin e njëjtë të çmimeve të derivateve në vend, Qeveria po i qet prej loje kompanitë e vogla .
“Tani udhëzimi administrativ i caktimit të çmimeve të naftës nuk kam hasur që thotë deri në një vlerë të caktuar apo të thotë një dysheme apo tavan i një çmimi të caktuar, por edhe nëse thotë e vëreni të gjithë naftëtarët çmimin e kanë të njëjtë pa marrë parasysh a është ajo shprehja deri apo jo të gjithë e kanë çmimin e njëjtë. Në këtë rast iu pamundësohet qytetarëve të bëjnë përzgjedhjen e kompanisë së tyre bazuar në çmimin më të ulët apo në shërbimet më të mira e kështu me radhe. Me këtë formë realisht kompanitë e vogla ti po i qet prej lojës dhe Qeveria ka krijuar një kartel zyrtar që në tërë territorin e Kosovës kemi çmime unike “, shtoi ai.
Kurse i pyetur se cila do të ishte masa që do të duhej të merrte Qeveria për të ulur çmimet e derivateve për qytetarët, Prestreshi tha se do të duhej të zbatohej masa e grupit parlamentar të Lidhjes Demokratike të Kosovës.
Sipas tij, ky propozim është i zbatueshëm edhe në shtetet tjera.
“Masa më e mirë është ajo e grupit parlamentar të Lidhjes Demokratike të Kosovës, ajo masë është ideale për uljen e akcizës apo uljen e TVSH-së në naftë e cila është lëndë e parë dhe ka ndikim direkt dhe indirekt në 100 e kusur produkte të tjera, sepse në momentin që ngritët nafta 100 e kusur produkte të tjera kanë ngritje të çmimeve, sepse janë të ndërlidhura direkt me naftën. Propozimi i LDK-së, në këto politika është i mirë dhe është i zbatueshëm në shtetet tjera që po veprojnë kështu”, shtoi tutje Prestreshi./teve1.info./
