Në Ditën Ndërkombëtare të të Zhdukurve, presidentja Vjosa Osmani dhe kryeparlamentari Glauk Konjufca kanë bërë homazhe te memoriali për të pagjeturit.
Presidentja Osmani në një deklaratë para mediave ka thënë se Serbia po vazhdon të shkelë Marrëveshjen e Brukselit dhe Aneksin e Ohrit, duke fshehur vendndodhjen e personave të zhdukur me dhunë.
“Përkundër faktit që gjatë këtij viti u arrit një marrëveshje në Bruksel dhe pastaj Aneksi në Ohër që ka krijuar obligim të qartë për Serbinë për t’i hapur të gjitha arkivat ku gjenden informatat lidhur me varrezat masive dhe vendndodhjen e të zhdukurve me dhunë dhe përkundër kërkesës së Komisionit qeveritar të bërë qysh në fillim të qershorit drejtuar presidentit të Serbisë që t’i hapë të gjitha ato arkiva në përputhje me obligimin e Marrëveshjes së Brukselit dhe Ohrit, fatkeqësisht Serbia ende vazhdon të bëjë shkelje flagrante të këtyre obligimeve e poashtu edhe vazhdon ta ripërsëritë krimin e saj duke e fshehur vendndodhjen e personave të zhdukur me dhunë gjatë luftës së fundit në Kosovë”, ka thënë Osmani.
Ajo i ka bërë thirrje komunitetit ndërkombëtar që të mendojnë për familjarët e të zhdukurve teksa ka shpresuar që dialogu nuk do të jetë një proces që do ta shpërlajë fytyrën e presidentit serb Vuçiq.
“I bëj thirrje të gjithë komunitetetit ndërkombëtar, të gjithë aleatëve dhe miqve të Kosovës, apo më mirë të gjithë aleatëve të të drejtave të njeriut që të mendojnë pak për nënat, motrat, vëllezërit, prindërit e familjarët e atyre fëmijëve të zahdukur të cilët ende janë në ato varreza masive në të cilat po flen Serbia edhe 25 vite pas lufte, të mendojnë pak për nënën që shkon te varri i zbrazët dhe nuk ka ku ta vendosë një lule. Shpresojmë shumë që më dialogu në Bruksel nuk do të jetë një proces nëpërmjet të cilit Kosovës do t’i bëhet trysni, popullit të Kosovës do t’i bëhen padrejtësi, ndërkohë që fytyra e Vuçiqit, një njeriu që ende fle mbi varreza masive, do të vazhdojë të shpërlahet padrejtësisht”, ka thënë Osmani, përcjell teve1.info.
Osmani ka thënë se Serbia po shkel marrëveshjen për të pagjeturit, dhe sipas saj është fatekqësi që Bashkimi Evropian nuk po e konstaton një gjë të tillë.
“Në të drejten e Konventës Ndërkombtare shtetet janë të obliguara të japin informacione për personat e zhdukur me forcë. Marrëveshje ka qenë vetë një shtesë që Serbia të tregojë për vendodhjen e personave që rezultojnë të zhdukur. Për fat te keq Bashkimi Evropian nuk po konstaton këto shkelje të qarta”, ka thënë Osmani.
