Protesta të dhunshme ndodhen në komunën e Zveçanit me 29 maj të vitit 2023.
Sulm ndaj pjesëtarëve të KFOR-it, Policisë së Kosovës e ndaj gazetarëve, me qëllimin e vetëm, kundërshtimin e hyrjes së kryetarit të kësaj komune, Ilir Peci nga radhët e PDK-së brenda objektit.
E gazetarët mbetën të ngujuar me orë të tëra në këtë kafeteri afër godinës së komunës, teksa barrikadat e grupet ekstreme serbe bllokuan rrethin që të qon në drejtim të komunës.
Zëvendësdrejtori i Policisë së Kosovës për rajonin e veriut, Veton Elshani, ka treguar për situatën që mbretëronte atë ditë.
“Qitu është rrethi që ka qenë shume i ndejshëm për neve, ura e hekurt atje dhe armatimin që e kemi zënë, situata më e ndejshëm na ka dal në Zveçan” , ka thënë Elshani.
Por një vit më pas situata është krejt ndryshe.
Megjithatë, të freskët e ka kujtimin e ballafaqimit me grupet protestuese kryetari i kësaj komune, Ilir Peci.
Ai rrëfeu përjetimin e asaj dite para kolegut të tij të Zubin Potokut dhe drejtorit të Policisë për rajonin e veriut.
“E kom pas atëherë vajzën 7 vjeçe, e ka parë hallakamë, polici, edhe e ka pyet nënën e vet se çfarë është duke ndodhur, i ka thënë ka shkuar babi kryetar dhe po e presin me krisma, kur shkova në shtëpi më tha pse nuk më more edhe mu se ishte shumë mirë”, tregon kryetari i komunës.
Por, kryetari i kësaj komune thotë se siguria në veri dallon me kohën para dhjetë muajsh.
“Unë e kam ndje vetën 100% të sigurt, në kuptimin se kam qenë me mbrojtje të afërt dhe policinë e Kosovës, ka vazhduar katër ditë, deri sa edhe një numër i madh i KFOR-it u plagosën. Sot gjithçka është në rregull, siguria për momentin është 100% sigurt, unë me zyrtarët dhe drejtorët pa përcjellje vijmë në komunë 5-10 herën ë ditë, punën po e bëjmë edhe më të lehtë”, ka thënë ai.
“Një pjesë e madhe e qytetarëve po e ndjejnë ndryshe situatën sa i përket akomodimit jetësorë”, shprehet Izmir Zeqiri, kryetar i Zubin Potokut.
Zëvendësdrejtori i Policisë për rajonin e veriut, Veton Elshani, i tha televizionit së në këtë zonë u gjetën edhe arsenal armësh.
“Këtu kanë qenë 93 ushtarë të lënduar, të plagosur, ka pas protestë të dhunshme që është zhvilluar këtu, në afërsi të këtij lokacioni kemi gjetur një veturë me armatim, kjo situatë konsiderohet si nata me ditë ndryshimi”, tregon Elshani.
Ndryshe nga Zveçani, kryetari i Leposaviqit, Lulzim Hetemi i cili qëndroi rreth 70 ditë i mbyllur në komunë, thotë se sot është funksionalizuar gjithçka në këtë pjesë të republikës.
“Nuk mund ta përshkruaj qysh ka qenë as vet nuk po besojmë si është sot situata, situata sikur në dy botë të ndryshme, situata e qetë, komuna në funksion sikur komunat e tjera të Kosovës. Qytetari serb mund të vjen të ankohet, policia janë këtu për ata, me ardhjen tonë këtu e kemi çliruar qytetarin serb”, shprehet Hetemi.
Rreth komunave veriore tashmë nuk qëndrojnë pjesëtarë të KFOR-it, për sigurinë po kujdesen Policia e Kosovës, ndërsa qytetarët po shijonin rrezet e diellit.
