Komuna e Prishtinës ka paralajmëruar me dërgim në Gjykatën Kushtetuese, Ministrinë e Financave nëse nuk merret vendimi për kthimin e mjeteve vetanake të pashfrytëzuar që ministria u ka marrë komunave.
Këtë e ka bërë të ditur nënkryetari i kryeqytetit, Alban Zogaj.
Ai në emisionin “ Ditari” në Tëvë 1 ka thënë ka një tendencë që këto mjete të bllokohen dhe këtë e quajti anti-kushtetuese.
“Do t’i drejtohemi Gjykatës Kushtetuese sepse konsiderojmë që kjo është anti-kushtetuese.Do të presim afatet ligjore për kthim të përgjigjes e ato veç janë duke rrjedhë, shumë shpjet kalohet ato. Dhe ministria e Financave duhet të na kthejë një përgjigje, sepse në Kuvendin Komunal ne kemi votuar me shumicë votash bartjen e mjeteve. Nëse na kthehet përgjigje negative që nuk mund të na kthehen mjetet tona, do t’i drejtohemi gjykatës”, ka thënë Zogaj.
Sipas tij ky vendim i ka dëmtuar të gjitha komunat, por më së shumti Prishtinën.
Zogaj ka thënë se të hyrat vetanake që i kanë mbledhur vet nga taksat e qytetarëve të Prishtinës i takojnë vetëm kryeqytetit dhe se nuk mund të shfrytëzohen tjetër kund.
Ministria e Financave kishte marrë vendim që tu marrë mjetet vetanake të pashfrytëzuara brenda vitit të paraparë nga komunat./teve1.info/
