Tash e dy ditë, presidenti i Serbisë po del me deklarime për mjetet ushtarake që ka Kosova.
Aleksandër Vuçiq po pretendon se dronët Bajraktar të Republikës po shihen në territorin e Serbisë.
Ai thotë se dronët me 5 dhe 20 qershor i pa atje.
“Qëllime ka shumë, unë do të flas për të gjitha qëllimet e tyre, ne dje i kemi analizuar. Sigurisht pasqyrimi i aftësive operative të ushtrisë sonë në një kuptim më të gjerë, në një kuptim më të ngushtë mund të flas më hollësisht dhe meqë ra fjala, Bajraktarët të ngritur në Gjakovë ishin të Prishtinës, janë ngritur më 5 dhe 20 qershor, ne i kemi shikuar sikur në pëllëmbë të dorës. Dhe sikur të ishte një kohë tjetër, nuk do të qëndronin gjatë në ajër. Kështu që meqenëse është hapësira e kontrolluar nga KFOR-i, ne respektojmë hapësirën e kontrolluar nga KFOR-i, kështu që ata bëjnë punën e tyre, ne bëjmë punën tonë”, ka thënë Vuçiq.
E kundërpërgjigjen për këtë pretendim e mori të enjten nga ministri i Mbrojtjes, Ejup Maqedonci.
Në një përgjigje për Tëvë1, Maqedonci thotë se këto deklarata janë të pasakta dhe se operimi i dronëve bëhet vetëm brenda shtetit të Kosovës.
“Kapacitet e Forcës së Sigurisë së Kosovës janë të fokusuara në ndërtimin e elementëve për mbrojtjen e territorit dhe sovranitetit të vendit tonë. Në këtë aspekt edhe dronët ‘Bayraktar’ si pjesë e sistemit të armatimit… i inventarit të FSK-së është pjesë përbërëse e njësive operacionale të FSK-së dhe ne në kuadër të FSK-së kemi njësinë e sistemeve ajrore pa pilotë që kryen operim me dronët “Bayraktar” dhe normalisht që operimi i tyre bëhet brenda territorit të Republikës së Kosovës, pa pasur synim vëzhgimin e asnjë vendi fqinj dhe pa pasur synim shkeljen e hapësirës ajrore të asnjë vendi. Normalisht bazuar në planin e operimit këta dronë fluturojnë në qiellin e Kosovës gjithmonë pra me synimin që të testohen, të operohet me ta me qëllim të vëzhgimit të terrenit në Republikën e Kosovës”, ka thënë Maqedonci.
Aleksandër Vuciq ka pasur deklarata edhe më herët për këtë çështje.
