I dërguari i posaçëm i Bashkimit Evropianë për dialogun Kosovë – Serbi, Miroslav Lajçak, ka thënë se nënshkrimi i marrëveshjes ndërmjet KEDS dhe Elektrosever, është hap i rëndësishëm për zbatimin e Udhërrëfyesit për Energjinë i arritur me lehtësimin e BE-së.
Ai ka thënë se më këtë marrëveshje do të ndalet praktika aktuale e parregullt.
Kujtojmë që nga paslufta, banorët në serbë në veri të Kosovës nuk kanë paguar për energjinë e shpenzuar.
“Duke e mbyllur javën me lajme të mira – dje dy kompanitë KEDS dhe Elektrosever nënshkruan kontratën e shumëpritur komerciale. Ky është një hap i rëndësishëm në zbatimin e Udhërrëfyesit për Energjinë të lehtësuar nga BE dhe nënkupton progres në rrugën e normalizimit të marrëdhënieve ndërmjet Kosovës dhe Serbisë. Më konkretisht, Elektrosever do të fillojë furnizimin me energji elektrike për katër komunat veriore të Kosovës me shumicë serbe, gjë që do t’i japë fund praktikës aktuale të parregullt”, ka shkruar Lajçak.
Ai ka thënë se ditët e fundit bashkë me ekipin e tij kanë qenë në përgaditje për diskutimet e ardhshme të ndara me kryenegociatorët e Kosovës dhe Serbisë.
Lajçak ka përmendur edhe takimin me ambasadorin e ShBA-së në Beograd, Christopher Hill.
Me të tha se kanë diskutuar për hapat e ardhshëm në dialog.
Më 21 qershor, Kosova dhe Serbia e nënshkruan udhërrëfyesin për zbatimin e Marrëveshjes për Energji, që ishte arritur më 2013 në kuadër të dialogut të ndërmjetësuar nga BE-ja./teve1.info/
