Nga Prishtina u nisën për në Vushtrri.
Por, për tre heronjtë, rruga do të pritej këtu në fshatin Pestovë.
Forcat serbe kishin rënë në gjurmët e Zahir Pajazitit, Hakif Zejnullahut dhe Edomnd Hoxhës.
Kjo bëri strukturat e larta të shtetit serb, ta organizojnë një pritë pikërisht në këtë vend.
E pak orë pasi ndodhi rasti, në vendngjarje erdhën edhe dëshmitarët e parë.
Kjo pasi lajmi arriti edhe në zyrat e LDK-së në Vushtrri.
“Si shkuam në zyre të LDK-së herët, na informuan se diçka ka ndodh tek Pestova, jemi çuar unë dhe një profesoreshë e nderuar, Bahrie Spanca, dhe një djalë me një veturë na ka dërguar tek vendi”, thotë ish-deputeti i LDK-së, Ibush Jonuzi.
Pas kësaj, ish-deputeti nga LDK, Ibush Jonuzi dhe Bahrie Spanca, u nisën për në vendin e ngjarjes.
Por, mbledhja e informacioneve në ato momente, sipas Jonuzit, ishte e vështirë.
“Tri shtëpi kemi hyrë, për me pyet se çfarë ka ndodhur. Na thonin se nuk e dimë se çfarë ka ndodhur, a u bo ndonjë aksident, a diçka u bë. Njerëzit kishin edhe frikë”, tregon Jonuzi.
Ibushi për Tëvë1, kanë treguar se çfarë panë në orët e para të mëngjesit të 1 shkurtit, kur arritën në vendin ku pas rezistencës së armatosur, heroikisht ra ish-komandanti i UÇK-së, Zahir Pajaziti, bashkëluftëtarët e tij, Hakif Zejnullahu dhe Edmond Hoxha.
“E kemi parë, gjaku ka qenë ende i freskët aty, kanë qenë dy molla aty dhe pesë gëzhoja të automatikut. Bahrie Spanca e ka fotografuar gjakun, dmth ka qenë ende i njomë dhe u shihke se ka qenë avra e livruar, që i kanë tërhequr zhagë kufomat e të ndjerëve me i largu nga aty. Ka qenë moment shumë i rëndë për neve”, thotë ai.
E dëshmitë që i mblodhën Jonuzi e Spanca, i dorëzuan në Këshillin për Mbrojtjen, Lirinë dhe të Drejtat e Njeriut.
Por, Tëvë1, ekskluzivisht publikon për herë të parë edhe këto fotografi, në të cilat shihen trupat e pajetë të atyre që njihen si “Pushka e Parë e Lirisë”.
Në njërën prej tyre, shihet trupi i ish-komdantit të UÇK-së, Zahir Pajaziti, vetëm pak kohë pasi ishte vrarë.
Në një foto tjetër, shihet trupi i nipit të Zahirit, luftëtarit nga Lladoci i Podujevës, Hakif Zejnullahut.
E po ashtu, edhe fotografia me trupin e pajetë, pasi iu kishte bërë obduksioni, të junikasit, Edmond Hoxha.
“Përmes KMLDNJ-së, në u organizuam dhe i bëmë këto fotografi, të cilat po i shihni ju, kemi vizituar familjet e Zahirit, edhe të Hakifit në Lladoc, por kemi shkuar edhe në Junik, te familja e Edmond Hoxhës…Dëshmojnë mënyrat se si janë vrarë, janë vrarë nga afër, me një breshëri plumbash”, ka thënë Behxhet Shala nga KMLDNJ.
Pas përfundimit të luftës, Zahir Pajaziti, Hakif Zejnullahu dhe Edmond Hoxha, nga presidenca e Kosovës, u dekoruan me dekoratën e lartë shtetërore, si “Hero të Kosovës”
