Përmes një komunikate për media bëhet e ditur se Kurti gjatë këtij takimi ka kërkuar që Greqia ta njohë pavarësinë e Kosovës
“Teksa i dëshiroi mirëseardhje Vakali, kryeministri Kurti theksoi marrëdhëniet shumë të mira mes dy vendeve dhe mundësitë e thellimit të tyre nëpërmjet rritjes së shkëmbimeve tregtare dhe rritjes së bashkëpunimit ekonomik dhe investimeve. Kryeministri Kurti kërkoi që Greqia t’ju bashkohet shumicës së vendeve të Bashkimit Evropian dhe ta njohë pavarësinë e Kosovës”, thuhet në komunikatë.
Ambasadorja Vakali tha se është e nderuar për detyrën që ka marrë dhe se Greqia është mike e sinqertë dhe e fuqishme e Kosovës.
“Edhe pse ende nuk e njeh pavarësinë e Kosovës, Greqia ka arritur të zhvillojë marrëdhënie bilaterale pa kurrfarë problem”, tha Vakali.
Ajo u shpreh e impresionuar me potencialin e madh që ka Kosova dhe mundësitë që ekzistojnë për bashkëpunimin bilateral. Ambasadorja e vlerësoi angazhimin e qeverisë për vlera demokratike dhe për rezultatet në luftimin e korrupsionit.
Tutje bëhet e ditur se kryeministri Kurti dhe ambasadorja Vakali u pajtuan që të vazhdohen projektet e përbashkëta në arsim e kulturë dhe në organizimin e radhës të forumit ekonomik.
