Kryetari i komunës së Tetovës, Bilall Kasami thotë se fronti i bashkuar opozitar në Maqedoninë e Veriut ka përkrahje nga kryeministri i Kosovës, Albin Kurti.
Sipas tij, presidenti dhe Qeveria në Maqedoninë e Veriut nuk janë të shqetësuar nga vizita e Kurtit por nga humbja në zgjedhjet e ardhshme.
Qeveria nuk ia doli ta fsheh apo kontrollojë frikën nga humbja në zgjedhjet e ardhshme, sidomos kur në pah doli fronti opozitar i bashkuar dhe me një përkrahje nga kryeministri i Kosovës Albin Kurti. E kuptojmë shqetësimin e Presidentit dhe Qeverisë, të cilës për çudi me përkrahje e reagime i doli krah edhe Beogradi, dhe e dimë se retorika e këtillë politike, nuk ka të bëjë aspak me vizitën e Albin Kurtit, por ka të bëjë me shqetësimin se opozita shqiptare në RMV po bashkohet dhe kësisoj ia numëron ditët kësaj qeverie të krimit dhe korrupsionit. Ardhja e kryeministrit Kurti sa ishte respekt dhe nder për shqiptarët e Maqedonisë së Veriut, po aq ishte edhe respekt për shtetin e Maqedonisë së Veriut, me të cilin është nënshkruar memorandumi i projektit të përbashkët, rrugës Tetovë-Prizren”, ka shkruar Kasami.
Vizita e Kurtit në Tetovë dhe takimi me vetëm përfaqësuesit e partive opozitare shqiptare ka ngjallë reagime dhe në Kosovë.
