Deputeti i Partisë Demokratike të Kosovës, Bekim Haxhiu, ka thënë se Qeveria Kurti është duke dashur që të legjitimojë nepotizmin dhe korrupsionin.
Haxhiu në emision “Ditari” në Tëvë1 tha se kjo qeveri, familjarët dhe njerëzit e VV që po i punëson është duke i justifikuar si eksperta.
“Realisht ajo që është duke ndodhur me këtë qeverisje nuk e ka pritur askush. As edhe fanatiket më të mëdhenj të Lëvizës Vetëvendosje nuk kanë pritur një degradim të tillë, ku ai që ka ardhur në pushtet me flamurin e ‘luftës’ kundër nepotizmit, korrupsionit dhe dukurive të tjera negative, del dhe bëhet një qeveri e cila përpiqet me legjitimuar nepotizmin. Pra, aty ku vendosin njerëz politik, familjarë të tyre duke i justifikuar si eksperta. Kjo nëse në një konkurs përzgjidhen njerëz të VV, sipas tyre ata kanë qenë më të mirët dhe për të njëjtat gjërat i kanë kaluar partitë tjera në të kaluarën”, tha deputeti i PDK-së.
Ai po ashtu tha se mbrojtja e ish-drejtorit të KEK-ut nga Kurti është rasti i fundit ku ai është duke dashur që të legjitimojë korrupsionin.
“Rasti i fundit i arrestimit të drejtorit të KEK-ut. Askush nuk e ka pritur që Kurti do të vendosët në anën e të arrestuarit për korrupsion dhe ka me paditë palën e akuzës në këtë rast prokurorinë, duke e akuzuar. Të gjithë kanë pritur që ai do të mbështes prokurorinë që ta luftojë korrupsionin. Pra, kjo është një përpjekje për të legjitimuar korrupsionin”, ka shtuar ai./teve1.info
