Një banor nga fshati Kushnin i Hasit më 16 shkurt kishte njoftuar në Policinë e Kosovës se në oborrin e tij i janë vjedhur para dhe stoli ari në vlerë rreth 33 mijë euro.
Ai në polici ka raportuar se i kishte groposur në oborrin e tij, pasi në dhjetor të vitit 2022 kishte një udhëtim për në Bosnje e Hercegovinë.
“Ankuesi ka deklaruar se para se te shkoj në Bosnje me date 17.12.2022 për një vizite mjekësore, pasi që gjithë familjen e ka atje, i kishte groposur në toke, në oborrin e tij dy “teglla” (tasa ) xhami me stoli ari me vlerë 6 deri 7 mijë euro dhe para 26.000 euro (njëzetë e gjashtë mijë).Pasi që është kthyer nga Bosnja me datën 14.02.2023, ka dashur që të i nxjerr stolitë e arit dhe shumën e parave që i kishte groposur, por përveç një ene me stoli ari që e ka gjete, sipas tij, mungonte ena tjetër me para ( 26.000 euro)”, ka thënë ai.
Por, sipas PK-së del se ankuesi kishte harruar vendndodhjen e mjeteve dhe arit ku e kishte fshehur.
Pas kthimit, ai kishte raportuar në polici se kishte gjetur vetëm një pjesë të arti dhe jo shumën prej 26 mijë euro dhe një sasi të arit.
Policia bënë të ditur se më 22 shkurt i njëjti në stacionin policor ka deklaruar se dyshon se vjedhja është kryer nga një fqinj i tij, të cilin e kishte angazhuar që të kujdesej për pulat në kohën sa ishte në Bosnje.
Policia thotë se i dyshuari është intervistuar i cili ka mohuar vjedhjen.
“Me date 22.02.2023 në Stacionin Policor Prizren, ka ardhur përsëri ankuesi, i cili ka deklaruar se vjedhjen e parave dhe stolive të arit dyshon se e ka kryer një i dyshuari –fqinjë i tij, të cilën ankuesi para se të shkonte në Bosnje ka deklaruar se e ka angazhuar që të kujdeset për pulat e tij.I dyshuarit , i cili pranon se gjate kohës sa ankuesi kishte shkuar në Bosnje, e kishte angazhuar që të kujdeset për pulat e ankuesit, por mohon kategorikisht se e ka kryer ketë rast të vjedhjes. Në lidhje me rastin dhe deklaratat e marra, veprimeve hetimore në teren është informuar prokurori kujdestar/ departamenti për krime të përgjithshme , i cili ka udhëzuar që të iniciohet rasti “ vjedhja e rende” , të kryhen veprime hetimore në drejtim të ndriçimit të rastit, ndërsa i dyshuari për momentin të lirohet në procedure të rregullt”, thuhet në komunikatën e Policisë.
Ndërsa, më 25 shkurt sipas PK-së, pronari i sendeve te vjedhura ka raportuar se pasi që edhe një here ka kontrolluar vendin e ka gjete edhe enën tjetër me para, në vendin ku e ka gropos, herën e parë kur i ka kërkuar parat e ka ngatërruar vendin./teve1.info/
