Nuk janë të paktë qytetarët që marrin rrugë drejtë institucionit të Agjencisë Shtetërore të Arkivave.
Ata dorëzojnë materiale që hyjnë në kategorinë e materialeve arkivore, të cilat më pas dërgohen për t’iu nënshtruar procedurave të ruajtjes.
“Një qytetar i cili ka dorëzuar pesë dosje të pesë vrasjeve politike që kanë ndodhë në vitet 1989-90, të veprimtarëve, të demonstruesëve, të aktivistëve të Lëvizjes Kombëtare për Liri”, shprehet Bislim Bislimi, drejtor ekzekutiv i Agjencisë Shtetërore.
Mirëpo, hapësira aktuale të Agjencisë Shtetërore të Arkivave, nuk premton edhe shumë vend për materiale të reja arkivore.
“Ne përpos që hapësirat aktuale i kemi jashtë standardeve, po ashtu nuk i kemi të mjaftueshme këto hapësira. Për momentin numd të pranojmë 2.5 km gjatësi lineare në Agjenci të Arkivave, e jashtë i kemi të regjistruar afërsisht 30 km. Kjo do të thotë se shteti i Kosovës është në një moment kur duhet ta trajtojë me shumë seriozitet zhvillimin dhe zgjerimin e hapësirës për ruajtjen e materialeve arkivore”, thotë ai.
Edhe për historianët, e padiskutueshme është rritja e përqendrimit dhe fokusit të institucioneve kah Arkivi i Shtetit.
“Duhet t’i kushtohet shumë rëndësi rregullimit të materialeve arkivore, sepse pjesa më e madhe e dokumenteve që ruhen aty nuk janë të rregulluara ashtu siç e parasheh legjislacioni në fuqi, këtu përfshihet rregullimi i Fondit të Kuvendit të Krahinës socialiste autonome të Kosovës, dhe fondi i Këshillit Ekzekutiv dhe institucioneve të tjera të asaj periudhe. E dyta duhet të kihet parasysh infrastruktura e brendshme e ndërtesës,” shprehet historiani Shkodran Imeraj.
Ministria e Kulturës, në kuadër të së cilës funksionin kjo Agjenci, vazhdon të heshtë për mungesën e investimeve dhe thirrjet për reagim.
