Deputeti i Partisë Demokratike të Kosovës, Xhavit Haliti ka deklaruar se Kosova në dialog me Serbinë do të duhej të “luftonte” me tri karta, por që siç tha ai, në fund të pranojë atë që thonë ndërkombëtarët.
Kjo pasi Haliti, nuk beson që asnjë shtet i Bashkimit Evropian do ta kundërshtonte marrëveshjen dhe do të ishte i interesuar të shkëpuste territor të Kosovës për t’ia dhënë Serbisë.
“Neve duhet me luftu me tri karta në dialog, me qenë të përgatitur për tri karta dhe në fund me pranu atë që na thonë. Nuk e besoj kurrë, kurrë se besoj asnjëri shtet i Bashkimit Evropian që do të kundërshtojë marrëveshjen, e para. E dyta që është e interesuar për me shkëputë territore të Kosovës me ja’u dhënë Serbisë, bile bile edhe në këto përpjekjet e para 4 – 5 vjetëve për tu marrë vesh, e ndërrim territoresh Bashkimi Evropian ka qenë kundër”, tha Haliti në emisionin “Këndi i Debatit” në Tëvë1.
“Tani nuk mundet me ndryshu politikë, sepse politika e Bashkimit Evropian është e tillë. Nuk pranohen ndërrimet e kufijve me dhunë, pa vullnetin e të dyja palëve dhe neve akoma nuk i kemi vendosë kufijtë dhe nuk e kemi bë demarkacionin me Serbinë”, shtoi Haliti./teve1.info./