Sot është bërë inaugurimi i Zonës Ekonomike në Budrikë të Vitisë.
Ministrja e Industrisë, Ndërmarrësisë dhe Tregtisë, Rozeta Hajdari ka thënë se presin që në këtë park të vendosën 30 biznese.
“Në këtë park industrial, ku përmes thirrjes publike presim të vendosën 30 biznese, pritet të lehtësohet bashkëpunimi dhe të do të forcohen lidhjet ndërmjet bizneseve duke ofruar kështu një potencial premtues për të rritur ndikimin e projekteve, të investimeve të qëndrueshme dhe të përgjegjshme nga perspektiva e vendit tonë”, ka deklaruar ajo, përcjell teve1.info
Hajdari tha se në këtë park mund edhe të ofrohen trajnime, rekrutime dhe shërbime të tjera të të bërit biznes.
“Me menaxhim të mirëfillte të parkut, përveç infrastrukturës fizike mund të ofrohen trajnime, rekrutime dhe shërbime të mëtejshme të zhvillimit të biznesit…Ne presim që pranë kompanive të ofrohen universitetet dhe institucionet kërkimore edhe për trajnim, të vendosura në parqe, duke ofruar kështu programe studimi dhe trajnimi të orientuara drejtë industrisë dhe për më shumë me një gamë të gjëra shërbimesh për zhvillimin e biznesit…”, ka deklaruar Hajdari.
Ndërsa, kryeministri, Albin Kurti tha se ky parku do të jep një kontribut të rëndësishëm për rritjen e zhvillimit ekonomik dhe rajonal, raporton teve1.info.
Kurti në fjalimin e tij tha se investimi kapital prej 1.7 milionë euro nga Ministria e Industrisë, Ndërmarrësisë dhe Tregtisë në hapësirë prej 15.5 hektarë në komunën e Vitisë, do të mbështesë investimet e përgjegjshme dhe të qëndrueshme të bizneseve nga diaspora dhe investime të huaja.
“Do të nxisë veprimtari prodhuese dhe përpunuese me teknologji të përparuar, do të ofrojë punësim dhe aftësim për të rinjtë tanë si shtyllë e zhvillimit dhe transformimit progresist të vendit tonë. Si dhe do të rrisë bashkëpunimin ndërmjet bizneseve”, tha ai.
Derisa sipas kryeministrit, me hapjen e këtij parku të rinjtë do të kenë më shumë mundësi të reja për punësim në vend, se sa t’i kërkojnë ato jashtë vendit./teve1.info