Shefi i Grupit Paralamnetar të Lidhjes Demokratike të Kosovës, Arben Gashi, ka thënë se Kosova e ka humbur mundësinë për të hartuar draftstatutin e Asociacionit të Komunave me Shumicë Serbe.
Ai ka thënë se kjo kuptohet edhe nga një deklaratë e kryeministrit të Kosovës.
Gashi ka thënë se qëndrimi i LDK-së ka qenë që Kosova ta shkruaj vetë draftstatutin.
“Sipas deklarimeve të kryeministrit po, ju e keni pa intervistën e kryeministrit ku deklarohet se Kosova më nuk e ka mundësi të shkruaj draftstatutin ndërkohë e ka pas. Kryeministri i Kosovës është parter i pabesueshëm për ndërkombëtarët dhe ky është një dëm ekstra për Kosovën”, ka thënë Gashi të enjten pas mbledhjes së Kryesisë së Kuvendit.
Kryetari i Kuvendit dhe njëherit nënkryetari i Vetëvendosjes Glauk Konjufca, ka thënë se BE-ja po tenton t’ia marrë Kosovës të drejtën që ka për ta hartuar draftstatutin për Asociacionin.
“Drafti i dorëzuar nga BE ka parregullsi sepse nuk është kompetencë e saj, dhe nëse nuk e modifikon këtë qëndrim po i bie që do me ja marrë me zor një kompetencë Kosovës, kjo është e pamundshme, sepse edhe në dokumente thuhet që Kosova duhet ta bëjë”, tha Konjufca.
