Ish-komandanti i UÇK-së në Koshare, Xhafer Gashi, ka rrëfyer përjetimet e rënies së luftëtarit dhe heroit, Agim Ramadani, më 11 prill 1999.
Gashi i cili njëherit është kryetar i Komunës së Obiliqit, në 25-vjetorin e kësaj beteje, tha se vrasja e Agim Ramadanit, ishte e papranueshme për të gjithë pjesëtarët e UÇK-së, madje tregoi se si kishin frikë të kumtonin lajmin për vdekjen e tij, pasi kanë pasur dyshime se ushtarët mund të ftohen për vazhdimin e luftës më tutje.
“Unë e kam njohur Agim Ramadanin edhe gjatë periudhës sa ishim në Zvicër bashkë, pastaj bashkë kemi ardhur në luftë. Pastaj kemi pasur frikë që kur do ta deklaronim para ushtarëve humbjen e Agim Ramadanit, mund të ketë ftohje apo frikë. Ne e morëm vesh më 11 prill, unë isha bashkë me komandantin kur na informuan. Komandantin e informoi Agron Jusufi, i cili i ka thënë se Agimi është plagosur rëndë. Ne pastaj bashkërisht shkuam tek një shtëpi e quanim “shtëpia e Sadikut”, e cila ka qenë në kufi, kur mbërritëm aty, e pamë që pushkën e kishte pasur një ushtar, e nga aty e kuptuam që gjendja e tij s’është e mirë. Në atë moment, Agron Jusufi na shprehu ngushëllime. Ka qenë një ndjenjë jashtëzakonisht e rëndë, jo vetëm për mua po edhe për komandantin. Ka qenë e papranueshme për secilin prej nesh që mund të vritet Agim Ramadani”, rrëfeu Gashi në emisionin “Këndi i Debati” në Tëvë1.
I pyetur se si mund ta përshkruante Agim Ramadanin, kryetari tha se ai ishte i dashur për të gjithë dhe se ka qenë piktor, shkrimtar, e përveç këtyre edhe aktor.
“Ishte ajo frika që do të ndikonte negativisht, por fatmirësisht ndodhi e kundërta, pasi kur e kuptuan ushtarët dhe udhëheqësit për rënien heroike të Agim Ramadanit, u betuan se “këmba e serbit s’do të shkelë aty ku është derdhur gjaku i dëshmorëve”, shtoi tutje Gashi.
Kujtojmë se Beteja e Koshares më 9 prill 1999, në kuadër të operacionit “Shigjeta”, është njëra ndër më të përgjakshmet dhe më heroiket e luftës së Ushtrisë Çlirimtare të Kosovës./teve1.info/.
