Kjo u bë e mundur edhe zyrtarisht pas miratimit në Kuvend të marrëveshjes së Kosovës me Mbretërinë e Bashkuar.
Nga Ministria e Mbrojtjes thanë se ky është një mision i përbashkët bashkë-zbarkues që mund të zgjasë deri në tri vjet.
“Synojmë të ngrisim kapacitetet profesionale sa i përket zbarkimeve jashtë vendit, por gjithashtu edhe ngritjen e shkathtësive operacionale dhe taktike sa i përket zhvillimit të operacioneve të tilla të cilat kanë qëllim ruajtjen e paqes dhe stabilitetit”, ka thënë Liridona Gashi, zëdhënëse në Ministrinë e Mbrojtjes.
Ndonëse sovraniteti i Ishujve Falkland është kontest mes Britanisë së Madhe dhe Argjentinës e cila nuk e njeh pavarësinë e Kosovës, nga ministria thonë se ka koordinim me të dyja shtetet për dërgimin e trupave atje.
“Në secilin mision që merr pjesë Forca e Sigurisë së Kosovës është në koordinim të plotë me aleatët tanë edhe në këtë rast ka qenë në koordinim të plotë me të dyja palët”, ka thënë Gashi për Tëvë1.
Ish-komandanti i FSK-së, Kadri Kastrati i vlerëson këto misione si shumë të rëndësishme për ushtrinë kosovare.
“Sepse Kosova prezantohet jashtë kufijve të vet, dmth veç ka fillu me u bë eksport i sigurisë, deri në një kohe kemi qenë vetëm import apo konsumues sigurisë dhe po tregojmë se tërë ai investim nga partnerët tanë strategjik po shpërblehet”, ka thënë Kastrati.
Për herë të parë në një mision jashtë vendit, FSK-ja kishte dërguar trupa vitin e kaluar në një mision paqeruajtës në Kuvajt.
Kronika e realizuar nga Gojart Jashari
