Në fshatin Besi, një autobusi i një kompanie private nga Ferizaj, është përfshirë nga zjarri pasditen e së dielës.
E për shuarjen e flakëve u deshtë edhe intervenimi i zjarrfikësve.
Këta për Tëvë1, e konfirmuan se në momentin e incidentit, brenda autobusit nuk kishte udhëtarë.
“Kemi pranuar thirrjen, rasti është lajmëruar si aksident me autobus, jemi pajisur, por kur kemi ardhur fatmirësisht ka qenë vetëm autobusi siç po shihet, dhe nuk ka pas udhëtar, ndërsa pronari nuk e ka lajmëruar rastin me kohë”
Se nuk pati persona të lënduar në këtë rast, e kanë konfirmuar edhe nga Policia e Kosovës.
“Policia menjëherë ka dalë në vendin e ngjarjes, po ashtu edhe zjarrfikësit të cilët kanë lokalizuar zjarrin. Nuk raportohet për persona të lënduar. Aktualisht policia ka nisur ndërmarrjen e veprimeve hetimore për sqarimin e plotë të rrethanave që karakterizojnë ngjarjen”, thuhet nga policia.
E gjatë gjithë kohës në vendngjarje qëndruan edhe pronarët e kompanisë nga Ferizaj.
Këta të fundit nuk pranuan të flasin para kamerës.
Por prapa saj i thanë televizionit, se dyshohet që zjarrin e shkaktoi një defekt brenda autobusit.
E ky indicet, bëri që në magjistrale për disa orë të krijohen kolona të gjata.
Për largimin e mjetit të djegur nga rruga, u angazhuan edhe banorët e fshatit.
Por, tentimi i pari nuk doli të jetë i suksesshëm
E sukses nuk pati as tentimi i dytë.
Krejt në fund, radha i erdhi mjeteve më të rënda.
Në këtë formë edhe autobusi i djegur u largua nga rruga.
Kjo bëri që pas afër tri orëve edhe magjistralja Prishtinë – Podujevë të lëshohet për qarkullim.
