Në Kosovë është shënuar 14 prilli, dita memoriale e të mbijetuarve të dhunës seksuale nga forcat serbe gjatë luftës në Kosovë.
Në shënimin e kësaj dite te parku memorial “Heroinat” në kryeqytet ishte dhe kryeministri i Kosovës dhe përfaqësues tjerë institucional.
“Ajo çfarë u ka ndodhur këtyre personave nuk u ka ndodhur për shkak të emrave të tyre të veçantë, apo karakteristikave individuale, por për shkak se ishin shqiptarë dhe dëshironin të jetonin në tokën e tyre të lirë. Janë mbi 20 mijë gra e vajza, burra e djem të cilët janë të përdhunuar gjatë luftës dhe është pjesë e gjenocidit që kemi përjetuar nga Serbia”, u shpreh Kurti.
E fjalëpakë por shumë emocionale, ishin dy nga të mbijetuarat e këtij krimi të luftës.
“Ishte një ditë shumë e tmerrshme për mua. Por unë sot jam shumë e fortë, jam shumë krenare për shtetin që kemi. Kemi ushtrinë tonë, policinë dhe me plot besimin që policia jonë dhe ushtria nuk do të bëjë çfarë bëri ushtria serbe”, tha Vasfije Krasniqi-Goodman.
“Ju lutem mos na harroni!”, tha Shyhrete Tahiri – Sylejmani – e mbijetuar e dhunës seksuale.
Se këto krime nuk do të harrohen, po ju premton ministrja e Drejtësisë, Albulena Haxhiu.
“Kemi punuar edhe në fuqizim të kapaciteteve të PSRK-së, për rritje të numrit të prokuroreve dhe stafit mbështetës, megjithatë edhe kundër mbështetjes sonë, ende nuk është ngritur numri e prokurorëve special, sepse me tre prokurorë në Prokurorinë Speciale, është e pamundshme që të adresohen krimet e luftës. Sot unë shfrytëzoj rastin që në ditën e të mbijetuarave të personave të dhunuar gjatë luftës së fundit në Kosovë, të bëj edhe një herë thirrje për drejtësi dhe t’i thërras institucionet që t’i kryejnë të gjitha përgjegjësitë që kanë”, tha Haxhiu.
Përmes një aktiviteti, 14 prillin këtu e shënuan edhe Qendra Kosova për Rehabilitimin e të Mbijetuarve të Torturës.
Ndryshe, numri i viktimave të dhunës seksuale gjatë luftës së fundit në Kosovë, është paraqitur të jetë rreth 20 mijë.
